कुवेतस्थित अमेरिकी सैन्य ठेगानामा आक्रमण गरेको इरानको दाबी, ‘अपरेसन लाइटनिङ’को १७औँ चरण सुरु

 

काठमाण्डौ ।  इरानले कुवेतमा रहेका अमेरिकी सैन्य ठेगानालाई लक्षित गरी नयाँ चरणको ड्रोन आक्रमण सुरु गरेको दाबी गरेको छ।

इरानी सेनाको जनसम्पर्क विभागले आइतबार विज्ञप्ति जारी गर्दै अमेरिकी आक्रमणको जवाफस्वरूप ‘अपरेसन लाइटनिङ’को १७औँ चरण सञ्चालन गरिएको जनाएको हो।

इरानी सेनाका अनुसार आक्रमणमा कुवेतस्थित क्याम्प अल-अदिरीमा रहेको अमेरिकी हतियार भण्डारलाई निशाना बनाइएको छ। त्यस्तै, अली अल-सलेम एयर बेसमा रहेका सैन्य उपकरण, हवाई प्रतिरक्षा राडार तथा सैनिक सुविधामा पनि ड्रोन प्रहार गरिएको दाबी गरिएको छ।

अमेरिका र इरानबीचको तनाव चर्किएपछि कुवेतलगायत खाडी मुलुकमा रहेका अमेरिकी सैन्य संरचनालाई लगातार निशाना बनाइएको तेहरानको दाबी छ। यद्यपि पछिल्लो आक्रमणबाट भएको क्षति तथा इरानले उल्लेख गरेका लक्ष्यमा प्रहार भए–नभएको स्वतन्त्र रूपमा पुष्टि भएको छैन।

यसैबीच, कुवेती सेनाले आफ्नो हवाई क्षेत्रमा प्रवेश गरेका शत्रुतापूर्ण क्षेप्यास्त्र र ड्रोनको सामना गरिरहेको जनाएको छ। सुनिएका विस्फोटका आवाज हवाई प्रतिरक्षा प्रणालीले आकाशमै लक्ष्य नष्ट गर्दा उत्पन्न भएको कुवेती सेनाको भनाइ छ।

पछिल्ला दिनमा अमेरिका र इरानबीच आक्रमण–प्रत्याक्रमण तीव्र बनेसँगै मध्यपूर्वमा थप ठूलो सैन्य द्वन्द्व फैलिने जोखिम बढेको छ।