‘सबैभन्दा तीव्र आक्रमण आज हुनेछ’– इरानबारे अमेरिकी रक्षामन्त्रीको सनसनीपूर्ण बयान

काठमाण्डौ । अमेरिकाका रक्षामन्त्री पीट हेगसेथ (Pete Hegseth) ले इरानविरुद्ध चलिरहेको युद्धमा आजसम्मकै सबैभन्दा तीव्र सैन्य आक्रमण हुन सक्ने बताएका छन्। 

अन्तर्राष्ट्रिय सञ्चारमाध्यमहरूका अनुसार उनले पेन्टागनमा आयोजित पत्रकार सम्मेलनमा “आज इरानमाथि हुने आक्रमण यस युद्धकै सबैभन्दा तीव्र दिन हुनेछ” भन्दै अमेरिकी सैन्य अभियान अझ तीव्र हुने संकेत दिएका हुन्।

अमेरिकी रक्षा मन्त्रालयका अनुसार अमेरिकाले इरानको मिसाइल क्षमता, ड्रोन उत्पादन र नौसैनिक शक्ति कमजोर पार्ने लक्ष्यसहित व्यापक आक्रमण गरिरहेको छ। सैन्य अधिकारीहरूका अनुसार हालसम्म ५० भन्दा बढी इरानी युद्धपोत नष्ट गरिएको र हजारौँ सैन्य लक्ष्यमा आक्रमण भइसकेको दाबी गरिएको छ।

अमेरिका र इजरायलले संयुक्त रूपमा सुरु गरेको यो सैन्य अभियान सन् २०२६ फेब्रुअरी २८ बाट तीव्र बनेको हो। उक्त अभियानअन्तर्गत तेहरान लगायतका विभिन्न सैन्य र सरकारी संरचनालाई लक्ष्य बनाइएपछि क्षेत्रीय तनाव तीव्र भएको छ। यसलाई केही अन्तर्राष्ट्रिय विश्लेषकहरूले मध्यपूर्वमा पछिल्ला वर्षकै सबैभन्दा ठूलो सैन्य टकरावका रूपमा पनि व्याख्या गरेका छन्।

मेरिकी पक्षले हालसम्म इरानको मिसाइल र ड्रोन आक्रमण क्षमता निकै कमजोर भएको दाबी गरेको छ। अमेरिकी सेनाका जनरलहरूका अनुसार युद्ध सुरु भएयता इरानबाट हुने ब्यालिस्टिक मिसाइल आक्रमण करिब ९० प्रतिशतले घटेको बताइएको छ।

तर यसैबीच इरानले भने अमेरिकी र इजरायली आक्रमणलाई “आक्रमणकारी युद्ध” भन्दै प्रतिरोध जारी राख्ने चेतावनी दिएको छ। युद्धका कारण मध्यपूर्व क्षेत्रमा तेल आपूर्ति, सुरक्षा अवस्था र विश्व अर्थतन्त्रमा समेत प्रभाव पर्न सक्ने भन्दै अन्तर्राष्ट्रिय समुदायले चिन्ता व्यक्त गरेको छ।