हावाहुरीले इनरुवादेखि देवानगञ्जसम्म मकैबाली नष्ट, किसान चिन्तित

काठमाण्डौं । सुनसरीको इनरुवालगायत विभिन्न स्थानीय तहमा बुधबार राति आएको तीव्र हावाहुरीले व्यावसायिक मकैखेतीमा ठूलो क्षति पुर्‍याएको छ।

इनरुवा, भोक्राहा, हरिनगर र देवानगञ्ज क्षेत्रमा लगाइएको मकैबाली हुरीका कारण व्यापक रूपमा नष्ट भएपछि किसानहरू चिन्तित भएका छन्।

कृषि ज्ञान केन्द्रका प्रमुख निलकमल सिंहका अनुसार प्रारम्भिक मूल्याङ्कनमा हावाहुरीका कारण कुल मकै उत्पादनमा करिब १० देखि २० प्रतिशतसम्म कमी आउने अनुमान गरिएको छ।  

उनले हाल जिल्लाभर भएको वास्तविक क्षतिको विवरण सङ्कलन भइरहेको पनि बताए।

भोक्राहा–६ का किसान नगेन्द्रकुमार साहले करिब १ बिघा १५ कठ्ठा क्षेत्रफलमा लगाएको मकैखेती पूर्ण रूपमा नष्ट भएपछि ठूलो आर्थिक नोक्सानी व्यहोर्नुपरेको बताए। 

उनका अनुसार यस खेतीमा करिब १ लाख ५० हजार रुपैयाँ लगानी गरिएको थियो भने ४ लाख रुपैयाँसम्म आम्दानी हुने अपेक्षा थियो। अहिले भने लगानी नै जोगाउन कठिन अवस्था आएको उनले गुनासो गरे।

पछिल्लो समय जिल्लामा गहुँभन्दा मकैखेतीतर्फ किसानहरूको आकर्षण बढ्दो देखिएको छ।  

कृषि ज्ञान केन्द्रका अनुसार आर्थिक वर्ष २०८२/८३ मा सुनसरीमा ११ हजार २०० हेक्टर क्षेत्रफलमा हिउँदे र वसन्ते मकैखेती गरिएको थियो।