नबिल बैंक र ग्लोबल आइएमई बैंकको तुलनात्मक अध्ययन, कुन सूचकमा कुन अब्बल ?

काठमाण्डौ । वाणिज्य बैंकहरुमा नबिल बैंक र ग्लोबल आइएमई बैंकलाई वित्तीय सूचकका आधारमा बलियो बैंक मानिन्छ ।  

दुबै बैंकको बलियो पूँजीसँगै नाफा, कर्जा लगानी, आम्दानी, जगेडा कोष लगायतका विभिन्न सूचक अब्बल देखिन्छन् ।  

आर्थिक वर्ष २०८२÷८३ को तेस्रो त्रैमासिक वित्तीय विवरणको आधारमा यी दुई बैंकको वित्तीय सूचकलाई आधार मानेर गरिएको तुलनात्मक अध्ययनमा नबिल बैंक नाफा र दक्षतामा अगाडी देखिएको छ भने ग्लोबल आइएमइ बैंकलाई शाखा संजाल वा वित्तीय सेवा पहुँचमा बलियो मान्न सकिन्छ ।  

सन् १९ ८४ मा स्थापना भएको नेपालको पहिलो निजी बैंकमध्ये नबिल बैंक एक हो । स्थापनापछि नबिल बैंकले आफ्नो वित्तीय अवस्थामा क्रमिक सुधार ल्याएको देखिन्छ । यता मर्जरपछि ग्लोबल आइएमई बैंक पूँजीको आधारमा सबैभन्दा ठूलो बैंक बन्न सफल भएको छ तर तुलनात्मक रुपमा नबिल बैंकको भन्दा पर्फमेन्स थोरै कमजोर देखिएको छ ।  

चालु आवको तेस्रो त्रैमाससम्म यी दुई बैंकले सर्वाधिक नाफा कमाउन सफल भएको छ । नबिलले ६ अर्ब ७४ करोड नाफा कमाउँदा ग्लोबल आइएमईले ४ अर्ब ४० करोड नाफा कमाएको छ । नबिलको नाफा गत आवको तुलनामा ३३.९२ प्रतिशत ग्रोथ भएको छ भने ग्लोबल आइएमई बैंकको २.९३ प्रतिशतले खस्किएको छ ।  

सो अवधिसम्म इम्पेयरमेन्ट चार्जका कारण ग्लोबल आइएमई बैंकको नाफामा सामान्य संकुचन देखिएको हो । ग्लोबल आइएमई बैंकको इम्पेयरमेन्ट चार्ज २५.८७ प्रतिशतले बढेको छ भने नबिल बैंकको इम्पेयरमेन्ट चार्ज ७९.१२ प्रतिशतले घटेको छ ।  

यता कर्जा लगानीमा भने दुबैको ग्रोथ देखिएको छ । नबिल बैंकको कर्जा लगानी ११.६६ प्रतिशत बढेर ४ खर्ब ४७ अर्ब ९४ करोड पुगेको छ भने ग्लोबल आइएमई बैंकको ६.२३ प्रतिशत बढेर ४ खर्ब ३९ अर्ब ४ करोड पुगेको छ । कर्जा लगानीको आधारमा नबिल भन्दा ग्लोबल आइएमई बैंक अब्बल देखिएको छ ।  

त्यस्तै, बैंकले कर्जा लगानी बाहेक अन्य क्षेत्र जस्तै बन्ड, ऋणपत्र, सेयर वा अन्य सम्पत्तिमा गरिएको लगानीमा पनि नबिल भन्दा ग्लोबल आइएमई बैंक अब्बल देखिएको छ । तेस्रो त्रैमाससम्म ग्लोबलको यस्तो लगानी ३०.२१ प्रतिशत बढेर १ खर्ब ४७ अर्ब ५० करोड पुगेको छ भने नबिलको २४.५५ प्रतिशत बढेर १ खर्ब २६ अर्ब ६७ करोड रुपैयाँ पुगेको छ ।  

ब्याज आम्दानीमा भने नबिल नै बलियो देखिएको छ । तेस्रो त्रैमाससम्म नबिलको ब्याज आम्दानी ३.३६ प्रतिशत बढेर १२ अर्ब ४५ करोड रुपैयाँ पुगेको छ भने ग्लोलब आइएमई बैंकको ३.५१ प्रतिशत घटेर ११ अर्ब ८८ करोड रुपैयाँ कायम भएको छ ।  

यसबाहेक वितरणयोग्य मुनाफा, इपीएस, नेटवर्थ, आरओई, एनपीएल, बेस रेट, स्प्रेड दर र लाभांश क्षमतामा पनि नबिल बैंक नै अगाडी देखिएको छ भने पीई रेसियो भने नबिल भन्दा ग्लोबल आइएमई बैंकको अवस्था राम्रो देखिएको छ ।  

नोट : यो अध्ययन केवल दुई बैंकबीचको तुलनात्मक विश्लेषण मात्रै हो । कारोबारको लागि सिफारिस होइन ।