३ महिनामा १७.५% ले बढ्यो सेयर धितो कर्जा, करोडमाथि लिने धेरै

काठमाण्डौ । चालु आर्थिक वर्षको पहिलो ३ महिनामा १ खर्ब ५ अर्ब ८२ करोड रुपैयाँबराबरको सेयर धितो कर्जा प्रवाह भएको छ । यो रकम गत असार मसान्तसम्ममा प्रवाह भएको तुलनामा १७.५ प्रतिशतले बढी हो ।  

गत असार मसान्तसम्म भने बैंक तथा वित्तीय संस्थाबाट ९० अर्ब ९ करोड ३२ लाख रुपैयाँबराबरको कर्जा प्रवाह भएको थियो । यसरी ३ महिनाको अवधिमा १५ अर्ब ७३ करोड रुपैयाँबराबरको थप सेयर धितो कर्जा प्रवाह भएको छ ।  

समीक्षा अवधिमा १ करोड रुपैयाँभन्दा माथि सीमाको सेयर धितो कर्जा सबैभन्दा धेरै प्रवाह भएको छ । असोज मसान्तसम्म १ करोड सीमा माथिको ६९ अर्ब ९७ करोड रुपैयाँबराबरको सेयर धितो कर्जा प्रवाह भएको छ । यो रकम गत असारसम्मको तुलनामा २५.१ प्रतिशतले बढी हो । गत असारसम्म बैंक तथा वित्तीय संस्थाबाट १ करोड माथि सीमाको ५५ अर्ब ९३ करोड रुपैयाँबराबरको सेयर धितो कर्जा प्रवाह भएको थियो ।  

यस्तै असोज महिनासम्म ५० लाखदेखि १ करोड रुपैयाँसम्म सीमाको १३ अर्ब ५९ करोड रुपैयाँबराबरको सेयर धितो कर्जा प्रवाह भएको छ । यो रकम असारसम्मको १२ अर्ब ४२ करोड रुपैयाँको तुलनामा ९.४ प्रतिशतले बढी हो ।  

यो अवधिमा २५ लाखदेखि ५० लाखको सीमासम्म यस्तो कर्जा १४ अर्ब ८७ करोड रुपैयाँ र २५ लाख मुनि ७ अर्ब ३९ करोड रुपैयाँबराबर प्रवाह भएको राष्ट्र बैंकको तथ्यांकले देखाएको छ ।