बैंक तथा वित्तीय संस्थाबाट रु.१.७ खर्बको सेयर धितोकर्जा प्रवाह, वाणिज्य बैंकहरुबाट मात्रै झण्डै ८६ अर्ब

काठमाण्डौ । बैंक तथा वित्तीय संस्थाबाट १ खर्ब भन्दा बढीको सेयर धितोकर्जा प्रवाह भएको छ । नेपाल राष्ट्र बैंकका अनुसार चालु आर्थिक वर्षको ४ महिनासम्ममा बैंक तथा वित्तीय संस्थाबाट १ खर्ब ७ अर्ब ७६ करोड रुपैयाँ बराबरको सेयर धितोकर्जा प्रवाह भएको हो ।  

बैंक तथा वित्तीय संस्थाबाट प्रवाह भएको यो सेयर धितोकर्जा गत आवको सोही अवधिसम्मको तुलनामा ३२.७९ प्रतिशत बढी हो । गत आवको चार महिनासम्ममा बैंक तथा वित्तीय संस्थाबाट कुल ८१ अर्ब १५ करोड ५८ लाख रुपैयाँ बराबरको सेयर धितोकर्जा प्रवाह भएको थियो ।  

बैंक तथा वित्तीय संस्थाहरुले सेयर धितोमा कर्जा प्रवाह बढाएकै कारण बैंकबाट लोन लिएर सेयरबजारमा लगानी गर्नेको संख्या बढेको हो । राष्ट्र बैंकको तथ्याङ्कअनुसार पछिल्लो केही समययता बैंकहरुबाट प्रवाह भएको कर्जामध्ये सेयर धितोमा जाने कर्जा अनुपातमा बृद्धि भएको छ ।  

चार महिनासम्ममा वाणिज्य बैंकहरुबाट मात्रै लगानीकर्ताहरुले ८५ अर्ब ९१ करोड रुपैयाँ बराबरको सेयर कर्जा लिएका छन् । जुन यो रकम गत आवको सोही अवधिसम्मको तुलनामा ३५.०८ प्रतिशत बढी हो । गत आवको सोही अवधिसम्ममा वाणिज्य बैंकहरुबाट लगानीकर्ताले ६३ अर्ब ६० करोड रुपैयाँ सेयर कर्जा लिएका थिए ।  

हाल स्ट्याण्डर्ड चार्टर्ड बैंकबाहेक सबै वाणिज्य बैंकहरुले यस्तो कर्जा प्रवाह गरिरहेका छन् । गत आवको तुलनामा राष्ट्रिय वाणिज्य बैंक, प्रभु बैंक, एनआइसी एशिया बैंक र हिमालयन बैंकबाट सेयर धितोकर्जा रकम घटेको छ भने बाँकी सबै बैंकको यस्तो कर्जा प्रवाह बढेको छ । सबैभन्दा बढी नेपाल एसबिआई बैंकको यस्तो कर्जा प्रवाह १८८२.३३ प्रतिशतले बृद्धि भएको छ ।  

चार महिनासम्ममा सबैभन्दा धेरै ग्लोबल आइएमई बैंकबाट ११ अर्ब १५ करोड रुपैयाँको सेयर धितोकर्जा प्रवाह भएको छ भने सबैभन्दा थोरै नेपाल एसबिआई बैंकबाट जम्मा ४७ करोड ४५ लाख रुपैयाँ प्रवाह भएको छ ।  

त्यस्तै, विकास बैंकहरुबाट प्रवाह भएको यस्तो कर्जा पनि २५ प्रतिशतले बृद्धि भएको छ । गत आवको कात्तिक महिनासम्ममा  १४ अर्ब ९ करोड १४ लाख रुपैयाँ सेयर धितोकर्जा प्रवाह भएकोमा चालु आवको ४ महिनासम्ममा १७ अर्ब ६२ क रोड ३६ लाख रुपैयाँको सेयर लोन प्रवाह भएको छ ।  

हालस १३ वटा विकास बैंकले सेयर धितोकर्जा प्रवाह गरिरहेका छन् । सबैभन्दा धेरै मुक्तिनाथ विकास बैंकबाट ३ अर्ब २८ करोड रुपैयाँको सेयर कर्जा प्रवाह भएको छ । सिन्धु विकास बैंक र मितेरी डेभलपमेन्ट बैंकबाट सेयर धितो कर्जा प्रवाह गत आवको तुलनामा घटेको छ भने बाँकी सबै बैंकको यस्तो कर्जा प्रवाह बढेको छ । सबैभन्दा बढी सप्तकोशी डेभलपमेन्ट बैंकको यस्तो कर्जा प्रवाह ८२७.७७ प्रतिशतले बढेको छ ।  

त्यस्तै, फाइनान्स कम्पनीहरुबाट पनि सो अवधिसम्ममा ४ अर्ब २३ करोड २७ लाख रुपैयाँ बराबरको सेयर धितोकर्जा प्रवाह भएको छ । यो रकम गत आवको सोही अवधिसम्मको तुलनामा २२.१९ प्रतिशत बढी हो । गत आवको ४ महिनासम्ममा फाइनान्स कम्पनीहरुबाट कुल ३ अर्ब ४६ करोड ४० लाख रुपैयाँको सेयर धितोकर्जा प्रवाह भएको थियो ।  

हाल १४ फाइनान्स कम्पनीले सेयरमा ऋण लगानी गरेका छन् । जसमध्ये सर्वाधिक मन्जुश्री फाइनान्सले ८२ करोड ५२ लाख रुपैयाँ सेयरमा ऋण लगानी गरेको छ । १४ मध्ये नेपाल फाइनान्स, गुडविल फाइनान्स र पोखरा फाइनान्सको यस्तो ऋण लगानी गत आवको सोही अवधिसम्मको तुलनामा घटेको छ भने बाँकी सबै कम्पनीको बढेको छ । सर्वाधिक बढ्नेमा भने सेन्ट्रल फाइनान्स रहेको छ । कम्पनीको सेयर धितोकर्जा प्रवाह ११२९.१२ प्रतिशतले बृद्धि भएको छ ।