जनकपुरमा सहकारी सफ्टवेयरसम्बन्धी अन्तरक्रिया कार्यक्रम सम्पन्न

काठमाण्डौ । सहकारी संस्थाहरुमा प्रविधिमा आधारित सेवा सञ्चालन तथा सफ्टवेयरको प्रयोगबारे मधेस प्रदेशका सहकारीकर्मीबीच अन्तरक्रिया तथा प्रशिक्षण कार्यक्रम सम्पन्न भएको छ ।  

फिनएक्स को–अपरेटिभ सफ्टवेयर निर्माण कम्पनी जिनव इंन्क प्रालीको आयोजनामा शुक्रबार जनकपुरधाममा भएको कार्यक्रममा मधेस प्रदेशका एकसय भन्दा बढी सहकारी संस्थाका अध्यक्ष, सञ्चालक, व्यवस्थापकहरुको सहभागिता रहेको थियो । कार्यक्रममा सहकारी संस्थाहरुमा आधुनिक प्रविधिको प्रयोग, सफ्टवेयर छनोट गर्ने आधार र यसबाट हुने फाइदाबारे छलफल गरिएको थियो ।  

अन्तरक्रियालाई सहजिकरण गर्दै सहकारी विज्ञ किरण पौडेलले सहकारी संस्थाहरुमा प्रविधिको प्रयोग र उपयुक्त सफ्टवेयरको छनोट लगायतका विषयमा प्रशिक्षण दिएका थिए । उनले सहकारीकर्मीलाई सफ्टवेयर छनोट गर्दा क्लाउड बेस, सहकारी ऐन, नियमसँग तथा मापदण्डसँग नबाझिने, थर्ड पार्टी एप्लिकेशन नचाहीने, नियामकको निर्देशन पालना गर्न र रिपोटिङ गर्न सहज हुने जस्ता विशेषता हेर्न सुझाव दिए ।  

कार्यक्रमको उद्घाटन गर्दै राष्ट्रिय सहकारी महासंघका सञ्चालक नथुनी यादवले सहकारीको विकास र विस्तारका लागि सहकारी ऐन र कानूनको पुर्ण पालना र पार्दर्शीतामा जोड दिनुपर्ने बताए । सहकारी संस्थाहरुले गरिबी निवारण, बेरोजगारी समस्याको समाधान र समाजको आर्थिक विकासमा खेलेको भुमिकाबारे विश्लेषण गर्दै उनले सहकारी प्रतिको नकारात्मक भावना हटाउन पनि आग्रह गरे । मधेस प्रदेशका सहकारी रजिस्ट्रारको कार्यालयकाअधिकृत वाशुदेव भट्टले सहकारीमा भएको समस्या हटाउन एवं सुशासन कायम गर्न सफ्टवेयरको प्रयोगबाट ठुलो सहयोग पुग्ने बताए ।  

कार्यक्रममा राष्ट्रिय बचत तथा ऋण सहकारी संस्थाकाअध्यक्ष रामनगिना राउत, समाज सेवी कृष्ण दिक्षिततथा स्वस्तिक बचत तथा ऋण सहकारी संस्थाका प्रमुख व्यवस्थापक विनोद थापाले पनि सहकारीको क्षेत्रको बारेमा धारणा राखेका थिए ।

गत साउनदेखि ‘फिनएक्स को–अपरेटिभ सफ्टवेयर’ नामबाट सञ्चालनमा रहेको सफ्टवेयरको सेवा हाल ५ सय वटा भन्दा बढी संस्थाहरुले प्रयोग गरिरहेका छन् । कोशी प्रदेश सहकारी रजिष्ट्रारको कार्यालयले जारी गरेको ‘सहकारी संस्थामा एप्लिकेशन सफ्टवेयर प्रयोगसम्बन्धी कार्यविधि–२०८१’ ले तोकेको मापदण्ड पुरा गरी सूचिकृत भएको सफ्टवेयरमा कोर बैंकिङका अतिरिक्त कर्जा लगानी प्रक्रिया सम्बन्धी विस्तृत मोडल, गो एएमएल, कोपोमिस, पल्स मनिटरिङ लगायत नयाँ सुविधाहरु छन् ।  

यस्तै सफ्टवेयरमा क्युआर कोड भुक्तानी तथा फर्छौट, मिस्डकल मार्फत मोबाइल रिचार्ज, बैंकबाट सहकारीमा र सहकारीबाट बैंक खातामा रकम ट्रान्सफर, ई–सेवा खल्ती लगायतका वालेटहरुमा रकम ट्रान्सफर र वालेटबाट सहकारीको खातामा रकम ट्रान्सफर, एटीएम, ई–टेलर लगायतका आधुनिक सुविधा उपलब्ध छन् ।