दिपलको विश्वव्यापी सफलता: ५ लाख गाडी डेलिभरीको कीर्तिमान

शाङ्घाई । चाङगान अटोमोबाइलको नयाँ ऊर्जा सवारी (एनईभी) ब्रान्ड दिपल (Deepal) ले विश्वव्यापी रूपमा ५ लाख युनिट डेलिभरी गर्दै महत्वपूर्ण कीर्तिमान कायम गरेको छ।

सन् २०२५ मे महिनामात्रै २५,५२१ इलेक्ट्रिक गाडी बिक्री गर्दै दिपलले अघिल्लो वर्षको सोही महिनाको तुलनामा ७८ प्रतिशत वृद्धि गरेको छ भने यो संख्या अघिल्लो महिना अप्रिलको तुलनामा २७ प्रतिशतले बढी हो।

हाल दिपल ब्रान्ड अन्तर्गत छ वटा मोडेलहरू बिक्रीमा छन्: SL03, S07, G318, L07, S05 र S09। यीमध्ये दिपल A09 मे २२ मा औपचारिक रूपमा सार्वजनिक गरिएको हो।

ब्रान्डको प्रमुख आकर्षक मोडेल दिपल S09 एक ठूलो ६ सिट क्षमताको एसयूभी हो, जसमा HarmonySpace 5 स्मार्ट ककपिट सिस्टम समावेश गरिएको छ। यस गाडीमा २१.४ इन्चको ३के रिजोल्युसन भएको सिलेङ-माउन्टेड रियर इन्टरटेन्मेन्ट स्क्रिन राखिएको छ, जुन ० देखि ७५ डिग्रीसम्म झुकाउन मिल्नेछ।

यस अत्याधुनिक इन्फोटेन्मेन्ट सिस्टममा डाइनामिक प्यानोरामिक साउन्ड, बालबालिकाका लागि विशेष सहायक, कस्टमाइज गर्न मिल्ने दृश्यहरू, र स्पेसियल म्याजिक क्युब जस्ता फिचरहरू छन्। साथै, यसमा Huawei को Qiankun Intelligent ADS 3.3 ड्राइभिङ सहायक प्रणाली पनि समावेश गरिएको छ।

दिपलले यसै वर्षको अन्त्यसम्ममा S09 मा नयाँ ADS 4 प्रणाली लागू गर्ने घोषणा गरेको छ। WEDA आर्किटेक्चरमा आधारित यो नयाँ प्रणालीले अन्त्यदेखि अन्त्य (end-to-end) ढिलाइ ५०% ले घटाउने, ट्राफिक दक्षता २०% ले बढाउने, र जबर्जस्ती ब्रेक लाग्ने अवस्थालाई ३०% ले कम गर्ने जनाइएको छ।

दिपलले आगामी वर्ष चीनभर ३०० नयाँ अनुभव केन्द्रहरू स्थापना गर्ने योजना बनाएको छ। यसअघि नै दक्षिण–पूर्वी एसिया र मध्यपूर्व बजारमा प्रवेश गरिसकेको दिपलले यस वर्षदेखि युरोपेली बजारमा पनि आफ्नो उपस्थिति विस्तार गरेको हो।

गत मे महिनामा आयोजित दिपल ब्रान्ड नाइट कार्यक्रममा कम्पनीका सीईओ डेङ चेंगहाओ ले "Smart Lead 2030" नामक दीर्घकालीन रणनीति सार्वजनिक गर्दै सन् २०३० सम्म विश्वभर २० लाख युनिट बिक्री गर्ने लक्ष्य लिएको घोषणा गरेका थिए। यस रणनीतिअनुसार चाङगानले ३० नयाँ मोडेलहरू बजारमा ल्याउनेछ।