नेप्सेको गिरावट आजपनि जारी, जानकार भन्छन्, ‘चाडपर्व सकिएसँगै बजारले गति लिन्छ’

काठमाण्डौ । साताको चौथो कारोबार दिन आज नेपाल स्टक एक्सचेञ्च (नेप्से) मा दोहोरो अंकको गिरावट आएको छ । आज नेप्से परिसूचक ०.८९ प्रतिशत अर्थात २२.५८ अंकले घटेर २ हजार ५०५.५८ विन्दुमा सीमित बनेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.६६ प्रतिशतले घटेर ४३७.०२ विन्दुमा झरेको छ । यो दिन नेप्सेमा सूचीकृत मध्ये ३१८ वटा स्क्रिप्टको ७६ लाख ११ हजार ६६० कित्ता सेयर ३ अर्ब १० करोड १८ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार नीमानन्द कंडेलले अहिले बजारले गति लिन नसक्नुमा राजनीतिक विषयवस्तु नै प्रमुख कारण रहेको बताए । उनले बजार घट्दो क्रममा हुँदा लगानीकर्ता आत्तिएको हुन सक्ने पनि प्रतिक्रिया दिए । यद्यपी बजार तल्लो तहमा रहेको कारण लगभग बटममा पुगेको पनि उनको बुझाइ रहेको छ । ‘अहिले लगानीकर्ताहरुले आवश्यक बाहेक बढी सेयर नबेच्दा कारोबार घटेको छ,’ उनले भने ।  

त्यसैगरि, बजार जानकार टेकेन्द्र थपलियाले पनि अस्थिर राजनीति कारण बजारले गति लिन नसकेको दाबी गरे । ‘यो अबस्था भनेको राजनीतिक संक्रमणको अवस्था हो । यदि देशमा चुनाव हुने वातावरण बनेर राजनीतिले एउटा दिशा निर्धारण गरेको खण्डमा लगानीकर्ताहरुमा पुनः विश्वासको वातावरण आउछ र सेयरबजारले गति लिन्छ’ उनले भने । तर पनि बजार संधै घटेको घट्यै नगर्ने र तिहार तथा छठ पछि भने बजारले एउटा गति लिनेमा उनी ढुक्क देखिए ।  

यो दिन नेप्सेमा सूचीकृत १३ वटा समूहमध्ये एउटा बाहेक अन्य सबैमा रातो पोतियो । आज म्युचुअल फण्ड समूह मात्रै बढ्यो । यो समूह आज ०.२४ प्रतिशतले बढ्यो ।  

व्यापार समूह आज सर्वाधिक अर्थात २.०९ प्रतिशतले घट्यो । यस्तै बैंकिङ समूह पनि आज ०.५४ प्रतिशत, विकास बैंक १.१४, फाइनान्स १.१०, होटल १.०६, हाईड्रो १.१८, लगानी ०.९८, जीवन बीमा ०.७५, उत्पादन तथा प्रशोधन ०.३९, लघुवित्त ०.५६, निर्जीवन बीमा ०.६५ र अन्य समूह १.२२ प्रतिशतले घट्यो ।  

धेरै कारोबार गर्ने कम्पनीहरु

यो दिन नेपाल पुनर्बीमा कम्पनीको सर्वाधिक सेयर कारोबार भयो । आज यो कम्पनीको २० करोड ५४ लाख बढीको सेयर कारोबार भयो । हिमालयन रि इन्स्योरेन्सको पनि आज १३ करोड ४९ लाख बढी, युनियन हाईड्रोपावरको १२ करोड ९८ लाख, बुटवल पावरको ९ करोड १५ लाख र हिमालयन डिष्ट्रलरीको ८ करोड ७२ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका कुनैपनि कम्पनीको सेयरमूल्यमा अपर सर्किट लागेन । समता घरेलु लघुवित्त आज टप गेनरको रुपमा रह्यो । यो कम्पनीको सेयरमूल्य आज ६.९३ प्रतिशतले बढ्यो ।  

यस्तै क्रेष्ट माईक्रो लाइफको सेयरमूल्य ३.६२ प्रतिशत र मातृभूमी लघुवित्तको सेयरमूल्य ३.१३ प्रतिशतले बढ्यो ।  

समाज लघुवित्तको सेयरमूल्य आज सर्वाधिक घट्यो । यो कम्पनीको सेयरमूल्य आज १० प्रतिशतले घट्यो । विन्ध्यवासिनी हाईड्रोको सेयरमूल्य पनि आज १० प्रतिशत, मनकामना इन्जिनियरिङको ५.८७, पञ्चकन्या माई हाईड्रोको ५.७५ र ग्रीन डेभलपमेन्ट बैंकको सेयरमूल्य ५.०२ प्रतिशतले घट्यो ।