जंगीअड्डामा दिनभर प्रधानमन्त्री माग्नेको लर्को, सेनाले माइकिङ गरेर भन्यो-'आज घर जानुस्, भोलि आउनुहोला'

काठमाण्डौ । नेपाली सेनाको जंगीअड्डामा आफूलाई प्रधानमन्त्री बनाइदिन माग गर्दै जानेहरुको बुधबार लर्को नै चल्यो ।  

यो लर्कोमा महावीर पुन, दुर्गा प्रसाईदेखि हर्क साम्पांगसम्म देखिए ।  

दिनभरजसो सैनिक नेतृत्व अब बन्ने अन्तरिम सरकार प्रमुखको खोजीका लागि विभिन्न समूहसँग वार्तामा व्यस्त रह्यो । 

जेनजीहरुको समेत विभिन्न समूहले आफूलाई आधिकारिता दाबी गर्दै जंगीअड्डाको व्यस्तता बढाइदिए । सैनिक नेतृत्वले समेत भ्याएसम्म धेरैको कुरा सुन्ने काम गर्यो ।  

जेनजीको एउटा ठूलो समूहले अन्तरिम सरकारको नेतृत्वमा पूर्व प्रधानन्यायाधीश सुशीला कार्कीको नाम अगाडि बढाएपछि जंगी अड्डा अगाडि अझ ठूलो भीड भयो ।  

त्यसबेलासम्म धरानबाट हर्क साम्पांग समेत भीडमै मिसिएर जंगीअड्डा पुगिसकेका थिए । दुर्गा प्रसाई उनी पुग्दा भर्खरै त्यहाँबाट छलफल गरी निस्किएका थिए ।  

केही जेनजी समूहले सुशीला कार्कीको नाम अगाडि बढाएपछि त्यसको विरोध गर्न ठूलो समूह जंगी अड्डाको गेटमा पुग्यो र नाराबाजी गर्यो । नाराबाजी निकैबेर चल्यो । त्यहाँ सुशीला कार्कीको नाममा त्यो समूहले असहमति जनाएको थियो । उनीहरुले काठमाण्डौ महानगरपालिकाका मेयर बालेन शाह, धरान उपमहानगरपालिकाका मेयर हर्क सम्पांग जस्ता युवाले सरकारको नेतृत्व लिनुपर्ने माग गरेका थिए । 

उनीहरुले माग मात्र राखेनन्, नाराबाजीलाई समेत अबेरसम्मै निरन्तरता दिइरहे, जसका कारण जंगी अड्डाको आवातजावत नै प्रभावित बन्न पुग्यो ।  

दिनभरको प्रधानमन्त्री बनाइदिन भन्दै आउनेहरुको लर्को, जेनजीका विभिन्न समूहहरुसँगको एकपछि अर्को वार्ता र स्टेक होल्डरहरुसँगको ब्याक टू ब्याक छलफल गरेको नेपाली सेनाले केहीबेरअघि माइकिंग गर्दै सबैलाई भोलि आउन भनेको छ ।  

माइकिंगमा सेनाका प्रतिनिधिले भनेका छन् -'तपाईहरुको कतिवटा समूह हो, नेता को हो, उसको सम्पर्क नम्बरसहित यहाँ नाम टिपाउनुहोला । हामी तपाईहरु सबैलाई छलफलमा बोलाउनेछौं । अहिले घर जानुहोला, भोलि आउनुहोला ।'  

सेनाको माइकिंग पछि अहिले जंगीअड्डाबाट युवाहरु घरतर्फ लागेका छन् । सो क्षेत्र केही शान्त देखिएको छ ।