सुनभन्दा ठूलो उछाल ! अमेरिकामा कफी पिउनु अब अत्यधिक महंगो

काठमाण्डौ । अमेरिकामा कफी पिउनु अब सर्वसाधारणका लागि झन् महँगो बन्दै गएको छ । गत अगस्टदेखि कफीको मूल्य ५० प्रतिशतले बढ्दै रेकर्ड स्तरमा पुगेको छ । अहिले अमेरिकामा कफीको मूल्य प्रतिपाउन्ड ४.३८ अमेरिकी डलरसम्म पुगेको छ, जुन हालसम्मकै उच्च दर हो ।

अमेरिकी सरकारले अगस्ट महिनामा ब्राजिलमाथि ५० प्रतिशत ट्यारिफ (कर) लगाएको थियो । सो कदमपछि अमेरिकी बजारमा कफीको मूल्य तीव्र गतिमा बढेको हो । त्यससँगै ब्राजिलमा परेको सुख्खा र त्यहाँका एक्सचेन्ज वेयरहाउसहरूमा कफीको भण्डार तीव्र रूपमा घट्दै जानुले मूल्य अझ बढाएको विश्लेषण गरिएको छ । हाल ब्राजिलियन कफी बीन्सको उपलब्धता रेकर्ड न्यूनस्तरमा पुगेको छ ।

ब्राजिल विश्वको सबैभन्दा ठूलो कफी उत्पादक देश हो । विश्वव्यापी उत्पादनको ३८ प्रतिशत कफी ब्राजिलबाट आपूर्ति हुने गर्दछ । गत वर्ष मात्र ब्राजिलले ६४.७ मिलियन ६० किलोका ब्याग बराबर कफी उत्पादन गरेको थियो ।

अमेरिकाले ब्राजिलसहित भारतजस्ता देशमाथि पनि उच्च ट्यारिफ लगाएको छ । अमेरिका ब्राजिलबाट कफीसँगै सुन्तलाको रस (ओरेन्ज जुस) पनि ठूलो मात्रामा आयात गर्छ । ब्राजिल ती केही देशमध्ये एक हो, जससँग अमेरिकाको व्यापार सन्तुलन (ट्रेड सरप्लस) सकारात्मक रहेको छ । तर, ब्राजिलमाथि भारी ट्यारिफ लगाउँदा दुबै देशबीचको व्यापारिक सम्बन्धमा असर परेको देखिन्छ ।

विश्वका प्रमुख कफी उत्पादक देशहरूको सूचीमा ब्राजिलपछि दोस्रो स्थानमा वियतनाम छ, जसले गत वर्ष २९ मिलियन ब्याग कफी उत्पादन गरेको थियो, जुन विश्व उत्पादनको करिब १७ प्रतिशत हो । त्यसपछि क्रमशः कोलम्बिया (१३.२ मिलियन), इन्डोनेसिया (१०.७ मिलियन), इथियोपिया (१०.६३ मिलियन), युगान्डा (६.७ मिलियन), भारत (६.२ मिलियन), होन्डुरास (५.५२ मिलियन), पेरु (३.८८ मिलियन) र मेक्सिको (३.८७ मिलियन) रहेका छन् ।

विश्लेषकहरूका अनुसार, यदि ब्राजिलमा सुख्खा जारी रह्यो र अमेरिकी ट्यारिफ नघटाइए, विश्व बजारमा पनि कफीको मूल्य अझै बढ्ने सम्भावना रहेको छ ।

-एजेन्सीको सहयोगमा तयार समाचार