झिनो अंकले बढ्यो सेयरबजार, कारोबार ३.४९ अर्ब

काठमाण्डौ । साताको अन्तिम कारोबार दिन आज नेपाल स्टक एक्सचेञ्च (नेप्से) परिसूचक झिनो अंकले बढेको छ। आज नेप्से परिसूचक ०.०१ प्रतिशत अर्थात ०.३१ अंकले बढेर २ हजार ५४४.९१ विन्दुमा पुगेको छ ।

यो दिन बलिया र राम्रा कम्पनीको मापक सेन्सेटिभ इन्डेक्स भने ०.०३ प्रतिशतले घटेर ४४०.८८ विन्दुमा झरेको छ । यो दिन नेप्सेमा सूचीकृत मध्ये ३२९ वटा स्क्रिप्टको ७६ लाख ५ हजार ५८४ कित्ता सेयर ३ अर्ब ४९ करोड ९८ लाख रुपैयाँभन्दा बढीको कारोबार भएको  छ ।  

आजको बजारबारे बजार जानकार प्रकाश रजौरे भन्छन्, ‘अहिले लगानीकर्ताहरु पर्ख र हेरको अवस्थामा छन् । लगानीकर्ताहरुमा कन्फिडेन्ट बढ्न सकिरहेको छैन । दीर्घकालिन लगानी गर्नेहरु विशेषगरी मौद्रिक नीतिको समिक्षाको पखाईमा पनि छन् । अहिले जति पनि कारोबार भइरहेको छ, त्यो सबै ट्रेडरहरुबाट भएको कारोबार हो । अझैपनि केही समूहले आन्दोलन गर्ने कुराले लगानीकर्ताहरु त्रसित पनि छन् । यस्ता विषयले लगानीकर्तामा मनोबल बढ्न सकिरहेको छैन । अब लगानीकर्ताले अपेक्षा गरेअनुसार र राष्ट्र बैंकले पनि केही सहजीकरण गरी मौद्रिक नीतिको समिक्षा ल्याएमा बजारमा केही सुधार हुन सक्छ ।’

अर्का बजार जानकार दामोदर गजुरेल पनि अहिलेको बजार साइड वेजमा चलिरहेको बताउँछन् । उनी भन्छन्, ‘बजार न घट्छ न त बढ्न नै सक्छ । लगानीकर्ताहरु पर्ख र हेरको अवस्थामा नै छन् । बजारलाई पछिल्लो समय राजनीतिक विषयले नै बढी प्रभाव पारिरहेको छ । लगानीकर्ताहरुले बजारमा सीमित स्क्रिप्टहरु मात्रै चलाइरहेका छन्, यसकारण कारोबार पनि बढ्न सकिरहेको छैन । केही समयसम्म बजार यहि आसपासमै रहने देखिन्छ ।’

यो दिन नेप्सेमा सूचीकृत १३ वटा समूहमध्ये ७ वटामा हरियाली छायो भने अन्य ६ वटामा रातो पोतियो । आज व्यापार समूह सर्वाधिक बढ्यो । यो समूह आज ०.७९ प्रतिशतले बढ्यो ।  

यस्तै बैंकिङ समूह ०.१२ प्रतिशत, फाइनान्स ०.०९, होटल ०.७२, हाईड्रो ०.२२, म्युचुअल फण्ड ०.२० प्रतिशत र लघुवित्त समूह ०.४५ अंकले बढ्यो ।  

 निर्जीवन बीमा समूह आज सर्वाधिक अर्थात ०.४६ प्रतिशतले घट्यो । विकास बैंक समूह ०.०८, लगानी ०.०७, जीवन बीमा ०.२३, उत्पादन तथा प्रशोधन ०.२९ र अन्य समूह ०.२४ प्रतिशतले घट्यो ।    

धेरै कारोबार गर्ने कम्पनीहरु

यो दिन हिमालयन पावर पार्टनरको सर्वाधिक सेयर कारोबार भयो । आज यो कम्पनीको १६ करोड ८० लाख बढीको कारोबार भयो । हिमालयन डिष्टिलरीको पनि आज १३ करोड ९१ लाख, युनियन हाईड्रोपावरको १३ करोड ३० लाख, उनआरएन इन्फ्रास्ट्रक्चरको १३ करोड ५ लाख र साहस उर्जाको १२ करोड २३ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका ६ वटा कम्पनीको सेयरमूल्यमा अपर सर्किट लाग्यो । आज माबिलुङ इनर्जी, स्वेत संगा हाईड्रो, सागर डिष्टिलरी, बन्दीपुर केवलकार, रुरु जलविद्युत र बुङ्गल हाईड्रोको सेयरमूल्यमा अपर सर्किट लाग्यो ।  

यस्तै दरमखोला हाईड्रोको सेयरमूल्य ६.८८ प्रतिशत, भूगोल इनर्जीको ४.९९ र दोल्ती पावरको सेयरमूल्य ४.२० प्रतिशतले बढ्यो ।  

यो दिन नेपाल माइक्रो इन्स्योरेन्सको सेयरमूल्य सर्वाधिक अर्थात ४.८२ प्रतिशतले घट्यो । इष्टर्न हाईड्रोपावरको सेयरमूल्य पनि आज ३.७० प्रतिशत र वेष्ट फाइनान्सको सेयरमूल्य ३.१८ प्रतिशतले घट्यो ।