जेपी मोर्गन सीईओको चेतावनी: अमेरिका युरोपको बाटो नलागोस्, नत्र ३० वर्षसम्म आर्थिक संकट !

मियामी । अमेरिकाको सबैभन्दा ठूलो बैंक जेपी मोर्गन चेजका प्रमुख कार्यकारी अधिकृत (सीईओ) जेमी डिमनले अमेरिकी अर्थतन्त्रलाई युरोपको बाटोबाट टाढा राख्न तत्काल कदम चाल्न आग्रह गरेका छन्। डिमनले व्यापारविरोधी नीतिहरूले अमेरिकालाई युरोपजस्तै आर्थिक मन्दीको दिशातर्फ लैजाने चेतावनी दिँदै भनेका छन्, "यदि यस्ता नीतिहरू जारी रहे, भने आगामी ३० वर्षमा अमेरिका युरोपको हालतमा पुग्न सक्छ।"

अमेरिकी व्यवसाय फोरममा मियामीमा सम्बोधन गर्दै डिमनले युरोपले गरेको मुख्य गल्ती औंल्याए। उनले भने, "युरोपमा उच्च कर र अत्यधिक नियमनका कारण जीडीपी वृद्धि घटेको छ, जसले व्यवसायिक वातावरणलाई कमजोर बनाएको छ। अमेरिकाले पनि यस्तै नीतिहरू अपनाउँदा कम्पनीहरू शहरहरूबाट सरेर जान थालेका छन्।" डिमनका अनुसार, अमेरिकी राज्य र शहरहरूले अब प्रतिस्पर्धी बन्नका लागि कदम चाल्नुपर्छ, नत्र लगानी घट्ने, प्रतिभाशाली मानिसहरूको पलायन हुने र करको स्रोत सुक्ने खतरा छ।

उनले थपे, "व्यापारविरोधी नीतिहरूले औसत अमेरिकी नागरिकलाई सहयोग गर्छ भन्ने धारणा गलत छ। यसले करको आधार घटाउँछ र साना व्यवसाय तथा कम आय भएका व्यक्तिहरूलाई नै बढी हानि पुर्याउँछ।" डिमनले अमेरिकी राष्ट्रपति डोनाल्ड ट्रम्पका ट्यारिफ नीतिहरूको पनि आलोचना गरे, जसले विश्वव्यापी व्यापारमा अवरोध सिर्जना गरेको र मुद्रास्फीतिलाई बढाएको छ। यसले भारत, जापान र चीनजस्ता देशहरूलाई पनि प्रभावित पारेको छ।

अर्थशास्त्रीहरूका अनुसार, युरोपको जीडीपी वृद्धि दर घट्दै गएको छ, जसलाई उच्च कर र नियमनको परिणाम मानिन्छ। डिमनको चेतावनीले अमेरिकी नीतिनिर्माताहरूलाई व्यापारमैत्री वातावरण सिर्जना गर्न प्रेरित गर्ने अपेक्षा गरिएको छ। यदि यस्ता नीतिहरू सुधारिएनन् भने, अमेरिकाले आर्थिक संकटको सामना गर्नुपर्ने विज्ञहरूले औंल्याएका छन्।

यो समाचारले विश्वव्यापी व्यापार युद्धको पृष्ठभूमिमा अमेरिकी अर्थतन्त्रको भविष्यप्रति चिन्ता व्यक्त गरेको छ।