अमेरिकी गुप्तचरको गोप्य रिपोर्ट रोयटर्समा लिक: इरानले जुनसुकै बेला अमेरिकामाथि आक्रमण गर्नसक्छ !

वाशिङ्टन ।इरानका सर्वोच्च नेता आयतुल्लाह अली खामेनेईको मृत्यु भएपछि इरान र उसका सहयोगी समूहहरूले अमेरिकामाथि लक्षित आक्रमण गर्न सक्ने अमेरिकी गुप्तचर मूल्याङ्कनले चेतावनी दिएको छ।

मार्च २ मा सार्वजनिक गरिएको र रोयटर्सले समीक्षा गरेको अमेरिकी गृह सुरक्षा विभाग (DHS) अन्तर्गतको Office of Intelligence and Analysis को फेब्रुअरी २८ को जोखिम मूल्याङ्कन प्रतिवेदनले इरान र उसका प्रोक्सीहरूबाट अमेरिकामाथि ‘सम्भावित लक्षित हमला’ को खतरा रहेको उल्लेख गरेको हो। यद्यपि प्रतिवेदनले ठूलो स्तरको भौतिक आक्रमणको सम्भावना भने कम रहेको जनाएको छ।

प्रतिवेदन अनुसार छोटो अवधिमा सबैभन्दा ठूलो चिन्ता इरान समर्थित ‘ह्याक्टिभिस्ट’ समूहहरूबाट हुने साइबर आक्रमण हो। यस्ता समूहहरूले अमेरिकी नेटवर्कहरूमा वेबसाइट बिगार्ने (defacement) तथा डिस्ट्रिब्युटेड डिनायल–अफ–सर्भिस (DDoS) जस्ता न्यून स्तरका साइबर आक्रमण गर्न सक्ने अनुमान गरिएको छ।

DHS को प्रतिवेदनमा भनिएको छ, “ठूलो स्तरको भौतिक हमला असम्भवजस्तै देखिए पनि इरान र उसका सहयोगीहरूले अमेरिकी भूमिमा लक्षित आक्रमणको निरन्तर खतरा उत्पन्न गरिरहने सम्भावना छ। यदि आयतुल्लाहको मृत्यु पुष्टि भयो भने प्रतिशोधात्मक गतिविधि वा त्यसका लागि आह्वान झन् तीव्र हुने लगभग निश्चित छ।”

यस विषयमा प्रतिक्रिया दिँदै अमेरिकी गृह सुरक्षा मन्त्री क्रिस्टी नोएमले संघीय गुप्तचर र कानुन कार्यान्वयन निकायहरूसँग प्रत्यक्ष समन्वयमा रहेर सम्भावित खतरामाथि नजिकबाट निगरानी र नियन्त्रणको प्रयास भइरहेको बताएकी छन्।

अमेरिकी सुरक्षा निकायले अवस्था संवेदनशील रहेको भन्दै आगामी दिनहरूमा साइबर तथा लक्षित आक्रमणको जोखिमलाई प्राथमिक चिन्ताका रूपमा हेरेको जनाएको छ।