युरोपमा जेट इन्धन अभावको चेतावनी, उडान अवरोधको जोखिम बढ्दै

काठमाण्डौ । अन्तर्राष्ट्रिय ऊर्जा एजेन्सी (आईइए)का प्रमुख फतिह बिरेलले युरोपमा जेट इन्धनको आपूर्ति संकट गम्भीर बन्न सक्ने चेतावनी दिएका छन्। हालको अवस्थालाई निरन्तरता दिइएमा युरोपसँग करिब ६ हप्ताको मात्र जेट इन्धन बाँकी रहन सक्ने अनुमान गरिएको छ।

आईइएको पछिल्लो प्रतिवेदन अनुसार, यदि मध्यपूर्वबाट हुने कम्तीमा आधा इन्धन आयात वैकल्पिक स्रोतबाट प्रतिस्थापन गर्न नसकिएमा जुन महिनासम्म आपूर्ति टिपिङ प्वइन्टमा पुग्न सक्छ। यसले केही विमानस्थलहरूमा इन्धन अभाव र उडान रद्द हुने अवस्था सिर्जना गर्न सक्ने चेतावनी पनि दिइएको छ।

रिपोर्टमा उल्लेख गरिए अनुसार, युरोप आफ्नो जेट इन्धनको ठूलो हिस्सा मध्यपूर्वबाट आयात गर्दै आएको छ, जसमा करिब ७५ प्रतिशत हिस्सा रहेको छ। हाल अमेरिका र नाइजेरियाबाट आपूर्ति बढाइए पनि, त्यसले पूर्ण अभाव पूर्ति गर्न नसक्ने बताइएको छ।

विश्लेषकहरूका अनुसार, वैकल्पिक आपूर्ति बढाइए तापनि गर्मीयामको यात्रा सिजन सुरु हुनु अघि नै इन्धन अभाव देखिन सक्ने जोखिम छ। विशेषगरी ठूला विमानस्थलहरूलाई प्राथमिकता दिइए पनि साना विमानस्थलहरू बढी प्रभावित हुन सक्ने अनुमान गरिएको छ।

युरोपेली संघले भने हाल तत्काल इन्धन अभावको कुनै प्रमाण नरहेको बताएको छ, तर निकट भविष्यमा आपूर्ति चुनौती आउन सक्ने स्वीकार गरेको छ। उड्डयन कम्पनीहरूले इन्धन मूल्य बढ्दा सञ्चालन लागतमा ठूलो असर परेको जनाएका छन्।

यसैबीच, केही एयरलाइन्सहरूले उडान कटौती गर्ने तथा इन्धन हेजिङ रणनीतिमार्फत लागत नियन्त्रण गर्ने प्रयास गरिरहेका छन्। युरोपेली विमानस्थल तथा एयरलाइन्स संगठनहरूले पनि आपूर्ति अवरोध लामो समयसम्म जारी रहे यात्रु सेवा प्रभावित हुन सक्ने चेतावनी दिएका छन्।