सरकारको बिचौलिया नियन्त्रण अभियान तीव्र, ३०९ जना पक्राउ

काठमाण्डौ । सरकारी तथा सार्वजनिक कार्यालयहरूमा सेवाग्राहीलाई अनावश्यक हैरानी दिने र बिचौलियाको रूपमा सक्रिय रहेको आरोपमा काठमाण्डौ प्रहरीले पछिल्ला केही महिनामा ३०९ जनालाई पक्राउ गरेको छ।

जिल्ला प्रहरी परिसर काठमाण्डौका अनुसार विभिन्न सरकारी कार्यालय वरपर नियमित निगरानी र लक्षित अपरेसन सञ्चालन गर्दै ती व्यक्तिहरूलाई नियन्त्रणमा लिइएको हो। पक्राउ परेकामाथि बिचौलियागिरी, सेवाग्राहीलाई दुःख दिने, गुण्डागर्दी तथा केही घटनामा यौनजन्य अपराधसम्बन्धी आरोप समेत रहेको प्रहरीले जनाएको छ।

प्रहरीले यस अभियानलाई बिचौलिया–मुक्त सेवा वातावरण निर्माणतर्फको प्रयासका रूपमा लिएको छ। हालसम्म पक्राउ परेकाविरुद्ध ६१ वटा छुट्टाछुट्टै मुद्दा दर्ता गरिएको छ।

सरकारी कार्यालय वरपर देखिने बिचौलिया गतिविधि लामो समयदेखि सेवाग्राही र प्रशासनबीचको एउटा अनौपचारिक सञ्जालका रूपमा रहेको छ। यसले कतिपय अवस्थामा नागरिकलाई छिटो सेवा दिलाउने बहानामा अतिरिक्त शुल्क असुल्ने, पहुँचका आधारमा काम गराउने र प्रक्रियागत पारदर्शितामा असर पार्ने गरेको आरोप छ।