बल्खु सुकुम्बासी बस्तीमा डोजर : दोस्रो चरणको हटाउने अभियान शुरु

काठमाण्डौं, बल्खुस्थित सुकुम्बासी बस्तीमा शुक्रबार सुरक्षाकर्मीको व्यापक उपस्थितिमा डोजर प्रयोग गरी संरचना हटाउने काम गरिएको छ।  

अधिकार क्षेत्र मिचेर निर्माण गरिएका संरचना हटाउने निर्णयअनुसार जिल्ला प्रशासन कार्यालय काठमाडौंले बुधबार सूचना जारी गर्दै बस्ती खाली गर्न बिहीबार साँझसम्मको समयसीमा तोकेको थियो।

 

सूचना जारी भएपछि प्रभावित क्षेत्रका बासिन्दाले आफ्नो सामान सार्ने काम तीव्र रूपमा अघि बढाएका थिए, जुन प्रक्रिया शुक्रबार बिहानसम्म पनि जारी रह्यो। बस्ती हटाउन ठूला डोजर (जेसीबी) परिचालन गरिएको छ।

काठमाडौं उपत्यकामा अतिक्रमित तथा नदी किनारका सुकुम्बासी बस्ती हटाउने सरकारी अभियानअन्तर्गत दोस्रो चरणको कार्य आजबाट शुरु भएको हो।

यसै क्रममा टेकुको वंशीघाट, शंखमूल, बुद्धनगर, बल्खु, कुलेश्वर, कपन, वसुन्धारा, गोंगबु, बालाजु र माछापोखरीलगायत क्षेत्रमा पनि अतिक्रमित जग्गा खाली गराउने तयारी गरिएको छ।

यसअघि पहिलो चरणमा सिनामंगलको गैरीगाउँ, शान्तिनगर, मनोहरा र थापाथली क्षेत्रका बस्तीहरू खाली गरिसकिएको थियो।