‘उनीहरूकै कारण यो कदम’ भन्दै स्टाटस, केही बेरमै बैंकरको मृत्यु

झापा । झापाको दमक नगरपालिका–८, लक्ष्मीमार्ग टोलका ४२ वर्षीय बैंकर पिताम्बर खड्का मृत अवस्थामा फेला परेका छन् ।

ग्लोबल आइएमई बैंकको विराटनगर शाखामा कार्यरत खड्काले सामाजिक सञ्जाल फेसबुकमा चार जनाको सामूहिक तस्वीर सार्वजनिक गर्दै आफू चरम मानसिक दबाबमा पुगेको संकेत गर्ने स्टाटस पोस्ट गरेका थिए । त्यसको केही समयमै उनी आफ्नै घरमा झुण्डिएको अवस्थामा फेला परेको प्रहरीले जनाएको छ ।

प्रहरीका अनुसार खड्काले फेसबुकमा दिपचन्द्र रेग्मी, अनमिका कुँवर सिंह, सुरेन्द्र रेग्मी र सुमन पोखरेलको तस्वीर राख्दै उनीहरूकै कारण आफू यस्तो कदम चाल्न बाध्य भएको आशय व्यक्त गरेका थिए । उनले फोटो राखेकामध्ये सुरेन्द्र रेग्मी ग्लोबल आईएमई बैंकका प्रमुख कार्यकारी अधिकृत हुन् भने सुमन पोखरेल नायव प्रमुख कार्यकारी अधिकृत हुन् । 

स्टाटस पोस्ट गरेको केही बेरपछि उनले घरको भुइँतलास्थित कोठामा सिलिङ फ्यानको हुकमा प्लास्टिकको पासो लगाई झुण्डिएको अवस्थामा फेला परेका हुन् ।

घटना साँझ करिब ५ बजेतिर भएको इलाका प्रहरी कार्यालय दमकले जनाएको छ । मृतकका बुवा महेश खड्काले छोरा झुण्डिएको अवस्थामा देखेपछि तत्काल प्रहरीलाई खबर गरेका थिए ।

सूचना प्राप्त हुनासाथ प्रहरी निरीक्षक नवीन राईको नेतृत्वमा पुगेको टोलीले घटनास्थलको मुचुल्का तयार गरी अनुसन्धान अघि बढाएको छ ।

दमक–८ का वडा अध्यक्ष धर्मप्रसाद दाहालका अनुसार शव पोस्टमार्टमका लागि दमक अस्पताल पठाइएको छ ।

प्रहरीले घटनाको पृष्ठभूमि, फेसबुक स्टाटसको आशय, उल्लेख गरिएका व्यक्तिहरूसँगको सम्बन्ध तथा मृत्युको वास्तविक कारणबारे गहन अनुसन्धान भइरहेको जनाएको छ ।