सुनको भाउ फेरि उकालो, प्रतितोला दुई लाख ९५ हजार नाघ्यो

काठमाण्डौं । नेपाली बजारमा मंगलबार सुन र चाँदीको मूल्य फेरि बढेको छ ।  

अन्तर्राष्ट्रिय बजारमा देखिएको मूल्य वृद्धिको प्रभाव स्थानीय बजारमा पनि परेसँगै बहुमूल्य धातुको कारोबार महँगिएको हो । 

पछिल्ला दिनहरूमा निरन्तर उतारचढाव भइरहेको सुनचाँदी बजारमा आज पनि मूल्य उकालो लागेको देखिएको छ ।

नेपाल सुनचाँदी व्यवसायी महासंघका अनुसार आज छापावाल सुनको मूल्य प्रतितोला पाँच सय रूपैयाँले वृद्धि हुँदै दुई लाख ९५ हजार तीन सय रूपैयाँ कायम भएको छ ।  

सोमबार यही सुन प्रतितोला दुई लाख ९४ हजार आठ सय रूपैयाँमा किनबेच भएको थियो ।

लगातार दोस्रो दिन सुनको मूल्य बढेको हो । यसअघि सोमबार मात्रै सुनको भाउ प्रतितोला आठ सय रूपैयाँले उकालो लागेको थियो ।

त्यसैगरी, चाँदीको मूल्यमा पनि सामान्य वृद्धि भएको छ ।  

सोमबार प्रतितोला पाँच हजार ४० रूपैयाँमा कारोबार भएको चाँदी मंगलबार पाँच हजार ८५ रूपैयाँ पुगेको महासंघले जनाएको छ ।

एक दिनमै चाँदीको मूल्य प्रतितोला ४५ रूपैयाँले बढेको हो ।

अन्तर्राष्ट्रिय बजारमा सुनको मूल्य बढिरहेकाले त्यसको प्रत्यक्ष असर नेपाली बजारमा परेको व्यवसायीहरूको भनाइ छ ।  

आज अन्तर्राष्ट्रिय बजारमा सुन प्रतिऔंस चार हजार पाँच सय ४४ अमेरिकी डलरमा कारोबार भइरहेको छ ।

विश्व अर्थतन्त्रमा देखिएको अनिश्चितता, अमेरिकी डलरको उतारचढाव तथा सुरक्षित लगानीका रूपमा सुनप्रतिको आकर्षण बढ्दा मूल्यमा चाप परेको बताइन्छ ।

पछिल्लो समय विवाहको मौसम र चाडपर्व नजिकिँदै जाँदा सुनको माग बढ्न थालेको छ ।  

बजारमा माग बढ्दै जाँदा आगामी दिनमा पनि सुनचाँदीको मूल्यमा थप उतारचढाव हुन सक्ने अनुमान व्यवसायीहरूले गरेका छन् ।