दोहोरो अंकले घट्यो सेयरबजार, जानकार भन्छन्, ‘भोल्युम नबढेसम्म माथि जाने सम्भावना न्यून’

काठमाण्डौ । आज सेयरबजार दोहोरो अंकले घटेको छ । आज नेपाल स्टक एक्सचेञ्ज (नेप्से)परिसूचक ०.४८ प्रतिशत अर्थात १३.४६ अंकले घटेर २ हजार ७६६.७८ विन्दुमा सीमित बनेको छ। यससँगै बलिया तथा ठूला कम्पनीहरूको मापक सेन्सेटिभ इन्डेक्स पनि ०.३५ प्रतिशतले घटेर ४७३.७६ विन्दुमा झरेको छ।

आज नेप्सेमा सूचीकृत ३५३ वटा स्क्रिप्टका १ करोड ५ लाख ९८ हजार १६४ कित्ता सेयर किनबेच हुँदा कुल कारोबार रकम ४ अर्ब ६९ करोड २० लाख बढीको सेयर कारोबार भएको छ । अघिल्लो दिन भने ५ अर्ब ७३ करोड ८१ लाख बढीको सेयर कारोबार भएको थियो।

आजको बजारबारे बजार जानकार तथा प्राविधिक विश्लेषक अजयसिं थापा (जय शम्भु) भन्छन्, ‘बजार लामो समयदेखि साइडवेजमै चलिरहेको छ । बजारमा केही समययता भोल्युम राम्रो छैन । बजार बढ्नका लागि नयाँ पैसा मार्केटमा आउन जरुरी छ । अहिले ठूला लगानीकर्ताहरु बजारमा सक्रिय देखिदैनन् र लगानीकर्ताले नयाँ पैसा थप्न पनि चाहिरहेका छैनन् । भोल्युम नबढ्दा सम्म मार्केट माथि जाने सम्भावना रहँदैन ।’

उनले भने, ‘अहिले नेपालको आर्थिक अवस्था पनि त्यति राम्रो देखिदैन । कर मात्रै बढाएको सरकारको बजेटलाई लगानीकर्ताहरुले त्यति मन पराएनन् । अब असार साउन लागेपछि बजारलाई थोरै सिजनल इफेक्ट पर्न सक्छ । बजार त्यति तल पनि नजाला र माथि उक्लिने सम्भावना पनि छैन । अब केही समयसम्म बजार यहि रेञ्जमै बसेर साइडवेजमै चल्ने देखिन्छ ।’

कुन समूहमा भयो कतिको थपघट ?

आज कारोबारमा आएका १३ वटा समूहमध्ये एउटा बाहेक अन्य सबै समूहमा रातो पोतियो । आज म्युचुअल फण्ड समूह मात्रै बढ्यो बढ्यो । यो समूह आज ०.३२ प्रतिशतले बढ्यो ।

यो दिन व्यापार समूह सर्वाधिक अर्थात १.७१ प्रतिशतले घट्यो । यस्तै बैंकिङ समूह ०.०३ प्रतिशत, विकास बैंक ०.४४, फाइनान्स ०.२३, होटल १.०७, हाईड्रो ०.५१, लगानी ०.४६, जीवन बीमा ०.४६, उत्पादन तथा प्रशोधन ०.५३, लघुवित्त ०.१८, निर्जीवन १.२० र अन्य ०.७५ प्रतिशतले घट्यो ।

सर्वाधिक कारोबार हुने कम्पनी

आज एभरेष्ट बैंक डिबेञ्चर ०८६ को सर्वाधिक अर्थात ३४ करोड १ लाख बढीको सेयर कारोबार भयो । यस्तै आँखखोला जलविद्युतको ३२ करोड ५ लाख, सेन्ट्रल फाइनान्सको १८ करोड ५२ लाख, नेपाल पुनर्बीमाको १७ करोड १९ लाख र सप्तकोशी डेभलपमेन्ट बैंकको १४ करोड ४७ लाख बढीको सेयर कारोबार भयो ।

सर्वाधिक कमाउने र गुमाउने कम्पनी

आज कारोबारमा आएका कम्पनीहरुमध्ये एउटा कम्पनीको सेयरमूल्यमा मात्रै अपर सर्किट लाग्यो। आज कालिञ्चोक हाईड्रोको सेयरमूल्यमा मात्रै अपर सर्किट लाग्यो ।

यस्तै न्यादी हाईड्रोको सेयरमूल्य ९.१६ प्रतिशत र सेन्ट्रल फाइनान्सको सेयरमूल्य ४.७८ प्रतिशतले बढ्यो ।

यो दिन विजय लघुवित्तको सेयरमूल्य सर्वाधिक अर्थात ४.६९ प्रतिशतले घट्यो । भगवति हाईड्रोको सेयरमूल्य पनि आज ४.२७ प्रतिशत र आँखुखोला जलविद्युतको सेयरमूल्य ४.०७ प्रतिशतले घट्यो ।