(2).gif)
.png)
काठमाण्डौ । प्रदेश सरकार र स्थानीय तहको साझेदारीमा मधेश प्रदेशका १ सय ३६ स्थानीय तहमा सञ्चालित जनस्वास्थ्य प्रयोगशालामा कार्यरत प्रयोगशालाकर्मीहरू विभिन्न माग राख्दै आन्दोलनमा उत्रिएका छन् ।
दीर्घ समयदेखि तलब तथा सेवा–सुविधा नपाएको गुनासो गर्दै उनीहरूले संयुक्त संघर्ष समिति गठन गरी जनकपुरधामस्थित प्रदेश जनस्वास्थ्य प्रयोगशालामा धर्ना तथा विरोध कार्यक्रम शुरु गरेका हुन् ।
आर्थिक वर्ष २०८२/८३ को कात्तिक महिनादेखि हालसम्म नियमित तलब प्राप्त नभएको, साथै चाडपर्व भत्ता लगायत कानूनअनुसार पाउनुपर्ने सेवा–सुविधा पनि रोकिएको उनीहरूको आरोप छ ।
दैनिक जीवनयापनमै कठिनाइ भएको भन्दै उनीहरूले तत्काल समस्या समाधानको माग गरेका छन् ।
त्यसैगरी, चालू आर्थिक वर्ष समाप्त हुने चरणमा पुगिसक्दा समेत कर्मचारीहरूको सेवा सम्झौता नवीकरण तथा म्याद थप प्रक्रियामा कुनै प्रगति नभएको उनीहरूले बताएका छन् ।
सम्झौता अन्योलमा पर्दा कामको निरन्तरता र सेवा प्रवाहसमेत प्रभावित हुने अवस्था आएको उनीहरूको भनाइ छ ।
समस्या समाधानका लागि सम्बन्धित प्रदेश तथा स्थानीय तहका निकायहरूलाई पटक–पटक मौखिक तथा लिखित रूपमा जानकारी गराइए पनि कुनै ठोस पहल नभएको कारण आन्दोलनमा उत्रिन बाध्य भएको प्रयोगशालाकर्मीहरूको दाबी छ ।
उनीहरूले कात्तिक महिनादेखिको बाँकी सम्पूर्ण तलब तत्काल भुक्तानी गर्न, चालू आर्थिक वर्षको पारिश्रमिक सुनिश्चित गर्न तथा सेवा सम्झौता अविलम्ब नवीकरण गर्न सरकारसँग जोडदार माग गरेका छन् ।
साथै चाडपर्व, पोशाक, जोखिम र महँगी भत्ता लगायत कानूनबमोजिमका सबै सुविधा उपलब्ध गराउन पनि उनीहरूले माग गरेका छन् ।
माग सम्बोधन नभए आन्दोलन जारी रहँदा जनस्वास्थ्य प्रयोगशालाबाट प्रदान हुने सेवा प्रभावित भए त्यसको सम्पूर्ण जिम्मेवारी सम्बन्धित प्रदेश तथा स्थानीय तहका निकायहरूले लिनुपर्ने चेतावनी समेत उनीहरूले दिएका छन् ।
.png)
.jpg)
