विश्वकपमा क्यानडाको ऐतिहासिक सफलता, इन्जुरी समयमा गोल गर्दै दक्षिण अफ्रिकालाई हरायो

काठमाण्डौ । सह–आयोजक क्यानडाले फिफा विश्वकप २०२६ को नकआउट चरणमा दक्षिण अफ्रिकालाई १–० ले पराजित गर्दै पहिलो पटक प्रतियोगिताको अन्तिम १६ मा स्थान सुरक्षित गरेको छ।

लस एन्जलसमा सम्पन्न प्रतिस्पर्धात्मक खेलको निर्धारित ९० मिनेटसम्म कुनै टोलीले गोल गर्न नसकेपछि इन्जुरी समयको दोस्रो मिनेटमा मिडफिल्डर स्टेफेन युस्टाक्वियोले पेनाल्टी क्षेत्र बाहिरबाट प्रहार गरेको शक्तिशाली लो–स्ट्राइक गोल नै निर्णायक बन्यो।

खेलभर क्यानडाले आक्रामक प्रदर्शन गर्दै धेरै अवसर सिर्जना गरे पनि दक्षिण अफ्रिकाको रक्षापंक्तिले लगातार चुनौती सामना गरेको थियो। दक्षिण अफ्रिकाले भने खेलभर केवल एक पटक मात्र लक्ष्यमा प्रहार गर्न सफल भयो।

क्यानडाका मुख्य प्रशिक्षक जेसी मार्सले ऐतिहासिक जितपछि आफ्ना खेलाडीलाई ‘क्यानडाका नायक’ भन्दै प्रशंसा गरेका छन्। उनले यो उपलब्धिले देशमा फुटबलको भविष्यलाई थप उज्ज्वल बनाउने विश्वास व्यक्त गरे।

यसअघि समूह चरणमा कतारलाई ६–० ले पराजित गर्दै विश्वकप इतिहासमा पहिलो जित निकालेको क्यानडाले त्यस सफलतालाई निरन्तरता दिँदै अर्को ऐतिहासिक उपलब्धि हासिल गरेको हो।

घाइते भएपछि समूह चरणका खेल गुमाएका स्टार खेलाडी अल्फोन्सो डेभिस यस खेलमा दोस्रो हाफमा मैदान प्रवेश गर्दै टोलीलाई थप ऊर्जा दिएका थिए।

अब क्यानडाले क्वार्टरफाइनल प्रवेशका लागि अन्तिम १६ मा नेदरल्यान्ड्स वा मोरक्कोमध्ये एक टोलीसँग जुलाई ४ मा ह्युस्टनमा प्रतिस्पर्धा गर्नेछ।