२१ कम्पनीले गरे लाभांश घोषणा, ९ वटाको बुक क्लोज हुन बाँकी

काठमाण्डौ । लाभांश सिजन सुरु भएसँगै नेपाल स्टक एक्सचेञ्ज (नेप्से)मा सूचीकृत कम्पनीहरुले धमाधम आ–आफ्ना लगानीकर्ताहरुको लागि लाभांश घोषणा गर्न थालेका छन् । हालसम्म २१ वटा कम्पनीले आर्जित मुनाफाबाट आफ्ना सेयरधनीको लागि प्रतिफल बाँड्ने निर्णय गरेका हुन् ।  

लाभांश घोषणा गरेका कम्पनीहरुमध्ये केही कम्पनीले दशैंअघि नै साधारण सभा समेत आह्वान गरेका छन् । लाभांश प्रस्ताव गरेका अधिकांश कम्पनीले बुकक्लोजको मिति तोकिसकेका छन् भने केहीको बन्द समेत भइसकेको छ ।  

२१ मध्ये अझैपनि ९ वटा कम्पनीको बुकक्लोज हुन बाँकी छ । यसर्थ उक्त कम्पनीहरुको सेयर दोस्रो बजारमा खरिद गर्दा लाभांश पाउन सकिनेछ । लाभांश घोषणा गरेका कम्पनीहरुमा सर्वाधिक हाइड्रो कम्पनी छन् । त्यस्तै, केही बैंक तथा वित्तीय संस्था र अन्य कम्पनी रहेका छन् ।  

लाभांश घोषणा गर्नेमा ९ वटा हाइड्रोपावर कम्पनी, दुईवटा जीवन बीमा कम्पनी, ६ वटा बैंक तथा वित्तीय संस्था, एक होटल, एक लगानी कम्पनी, एक उत्पादन तथा प्रशोधन र एक अन्य कम्पनी रहेका छन् ।  

९ कम्पनीको बुक क्लोज हुन बाँकी  

लाभांश घोषणा गरेका २१ कम्पनीहरुमध्ये अझैपनि ९ कम्पनीको सेयर खरिद गर्दा लाभांश पाउन सकिनेछ । जसमा हाथवे इन्भेष्टमेन्ट कम्पनी, सुपर मादी हाइड्रो, युनिलिभर नेपाल, सिटिजन्स बैंक र रुरु जलविद्युतको बुकक्लोज मिति तय भएपनि अझै सेयर खरिद गर्ने अवसर बाँकी छ ।  

साथै स्वाबलम्बन लघुवित्त, आशा लघुवित्त, मन्दाकिनी हाइड्रोपावर र सुपर माई हाइड्रोले भने लाभांश वितरण प्रयोजनार्थ बुकक्लोजको मिति तोक्न बाँकी नै छ । यसर्थ यी कम्पनीहरुको पनि सेयर खरिद गरि लाभांश पाउन भरपुर अवसर बाँकी नै छ ।