बाढीपहिरोको क्षतिले रु.६० करोडको मोटर बीमा दाबी, २४.०१% भुक्तानी

काठमाण्डौ । बाढीपहिरोले क्षति पुर्याएका कारण निर्जीवन बीमा कम्पनीहरुमा १ हजार भन्दा बढी मोटर बीमाको दाबी परेको छ । नेपाल बीमा प्राधिकरणका अनुसार मंसिर १२ गतेसम्ममा १४ निर्जीवन बीमक र ४ वटा लघुबीमक गरी कुल १८ वटा बीमा कम्पनीमा १ हजार २८० वटा सवारी साधनको दाबी परेको हो ।  

प्राधिकरणका अनुसार सो अवधिसम्ममा निजी सवारीतर्फ ९०२ वटा र सार्वजनिक सवारीतर्फ ३७८ वटा सवारी साधनको दाबी परेको हो । सो अवधिसम्ममा ६० करोड ६० लाख ३३ हजार रुपैयाँको दाबी परेको हो ।  

जसमा निजी सवारीतर्फ ३७ करोड ४५ लाख ४९ हजार र सार्वजनिक सवारीतर्फ २३ करोड १४ लाख ९० हजार रुपैयाँ बराबरको बीमा दाबी परेको छ ।  

हालसम्म बीमा कम्पनीहरुले भने ५१५ वटा मोटर बीमाको दाबी भुक्तानी गरेको प्राधिकरणले जनाएको छ । जसमा निजीतर्फ ३८० वटा सवारी र सार्वजनिक तर्फ १३५ वटा सवारी साधनको दाबी भुक्तानी गरिसकेको छ प्राधिकरणले जनाएको छ । प्राधिकरणका अनुसार बीमा कम्पनीले गरेको अग्रिम दाबी भुक्तानीको विवरण समेत समावेश गरिएको छ ।  

सो अवधिसम्ममा १४ करोड ५९ लाख ३८ हजार रुपैयाँ बराबरको मोटर बीमाको दाबी भुक्तानी भइसकेको छ । निजीतर्फ ८ करोड ४७ लाख ५० हजार रुपैयाँ र सार्वजनिकतर्फ ६ करोढ ११ लाख ८८ हजार रुपैयाँ बराबरको दाबी भुक्तानी भएको हो ।  

हालसम्मा दाबी परेको मोटर बीमाको रकममा बीमा कम्पनीहरुले जम्मा २४.०१ प्रतिशत बीमाको मात्रै दाबी भुक्तानी दिएको छ ।  

मंसिर १२ गतेसम्ममा निर्जीवन बीमकहरुमा विभिन्न बीमालेखहरुको ३ हजार ५२९ वटा बीमा दाबी परेको छ । कम्पनीहरुमा १२ अर्ब २६ करोड ४ लाख रुपैयाँ बराबरको बीमा दाबी परेको हो । प्राधिकरणका अनुसार बीमकहरुले सो अवधिसम्ममा १ हजार २१५ वटा बीमा वापत ७८ करोड ९३ लाख रुपैयाँ बराबरको दाबी भुक्तानी दिइसकेको छ ।  

बाढीपहिरोका कारण देशका विभिन्न स्थानमा धनजनको क्षति भएको छ । बीमा कम्पनीहरुमा बीमा दाबीको चाप बढ्दो छ । सम्पत्ति बीमा, इन्जिनियरिङ तथा ठेकेदार जोखिम बीमा, मोटर बीमा, सामुद्रिक बीमा, पशुपन्छी बीमा, कृषि बाली बीमा र विविध गरी मंसिर १२ गतेसम्ममा साढे ३ हजार वटा बीमाको दाबी परेको हो ।