ट्रम्पसँगको चर्को बहसपछि अमेरिका र युक्रेनबीच पुनःवार्ता हुने, जेलेन्स्कीले भने हुने छैनन् सहभागी

काठमाण्डौ । दुई देशका प्रमुखबीच भएको नोकझोकपश्चात युक्रेन र अमेरिकाबीच पुनःवार्ता हुने भएको छ । यसको जानकारी युक्रेनी राष्ट्रपति भ्म्लोडिमिर जेलेन्स्कीले दिएका हुन् । जेलेन्स्कीले अमेरिका र युक्रेनबीच अर्को हप्ता साउदी अरेबियामा वार्ता हुने बताएका हुन् । जेलेन्स्कीले यो महत्वपूर्ण बैठक हुने आशा व्यक्त गरे।

जेलेन्स्की खाडी देशमा हुनेछन्, तर यो कुराकानीमा भाग लिने छैनन्। उनले युक्रेनले जतिसक्दो चाँडो स्थायी शान्तिका लागि काम गरिरहेको बताए ।

अमेरिकी राष्ट्रपति डोनाल्ड ट्रम्पका विशेष दूत स्टिभ विटकफले अमेरिकी टोलीले रुस–युक्रेन युद्ध अन्त्य गर्न शान्तिको रुपरेखामाथि  छलफल गर्न चाहेको बताए।  

गत शुक्रबार ह्वाइट हाउसमा जेलेन्स्की र ट्रम्पबीच चर्को बहस भएको थियो । जसमा ट्रम्पले जेलेन्स्की लडाई अन्त्य गर्न तयार नभएको बताएका थिए । यसैबीच अमेरिकाले युक्रेनलाई दिँदै आएको सैन्य सहायता रोकेको छ र गुप्तचर सूचना आदान प्रदान गर्न बन्द गरेको छ ।

युक्रेनी राष्ट्रपतिले घटनाप्रति दुःख व्यक्त गर्दै देशको सबैभन्दा ठूलो सैन्य आपूर्तिकर्ता अमेरिकासँगको सम्बन्ध सुधार गर्न प्रयासरत रहेको बताएका छन् । बिहीबार, विटकफले ट्रम्पले जेलेन्स्कीबाट माफी र धन्यवाद लेखिएको पत्र प्राप्त गरेको थियो।

रुसले फेब्रुअरी २०२२ मा युक्रेनमा पूर्ण मात्रामा आक्रमण सुरु गरेको थियो र अहिले रुसले युक्रेनको करिब २० प्रतिशत भूभाग ओगटेको छ।