दुई सातापछि २७ सय विन्दुमाथि टिक्यो नेप्से, जानकार भन्छन्,‘सम्हालिने प्रयासमा बजार’

काठमाण्डौ । साताको चौथो कारोबार दिन आज नेपाल स्टक एक्सचेञ्च (नेप्से) मा दोहोरो अंकको सुधार आएको छ । आज नेप्से परिसूचक ०.८९ प्रतिशत अर्थात २३.८६ अंकले बढेर २ हजार ७००.०४ विन्दुमा पुगेको छ ।

यससँगै नेप्से २ सातापछि २७ सयमाथि टिकेको छ । यसअघि गत चैत ५ गते नेप्से परिसूचक २७ सय विन्दुबाट तल खसेको थियो ।  

यो दिन बलिया र राम्रा कम्पनीको मापक सेन्सेटिभ इन्डेक्स पनि ०.२४ प्रतिशतले बढेर ४४७.७७ विन्दुमा पुगेको छ । यो दिन नेप्सेमा सूचीकृत मध्ये ३१८ वटा स्क्रिप्टको १ करोड ४ लाख ४२ हजार ६८३ कित्ता सेयर ५ अर्ब ४४ करोड ४४ लाख रुपैयाँभन्दा बढीको कारोबार भएको  छ ।

आजको बजारबारे बजार जानकार दामोदर गजुरेल भन्छन्,  ‘आज बजार सम्हालिन खोजेको जस्तो देखिन्छ । यद्यपी लगानीकर्ता अझैपनि पर्ख र हेरको अवस्थामै छन् । कारोबार औषतभन्दा अझैपनि तलनै छ ।’

उनले प्राविधिक रुपमा हेर्दा भने अहिले खरिदका लागि उपयुक्त अवसर रहेको बताए । गजुरेलले आन्दोलनको प्रभाव मत्थर हुँदै जादा बजार बिस्तारै माथितर्फ लाग्ने विश्वास व्यक्त गरे ।  

अर्का बजार जानकार अजयसिंह थापा(जयशम्भु)ले पनि आन्दोलनको प्रभाव कम हुँदै गएको, नेप्सेले नयाँ नेतृत्व पाएको र चाडै नियुक्त हुने गभर्नरको विषयले बजारको माहोल सकारात्मक बन्दै गएको बताए । ‘प्राविधिक रुपमा पनि बजार केही माथि जाने देखिन्छ,’ उनले भने ।    

यो दिन नेप्सेमा सूचीकृत १३ वटा समूहमध्ये २ वटा बाहेक अन्य सबैमा हरियाली छायो । आज व्यापार समूहमा उछाल आयो । यो समूह आज ९.४९ प्रतिशतले बढ्यो । यस्तै बैंकिङ समूह ०.६१ प्रतिशत,विकास बैंक ०.५१, फाइनान्स ३.२६,होटल ०.५२,हाईड्रो ०.५४,लगानी १.३९,जीवन बीमा ०.५०,लघुवित्त ०.१२,म्युचुअल फण्ड ०.६५ र अन्य समूह ०.१५ प्रतिशतले बढ्यो ।  

उत्पादन तथा प्रशोधन समूह र निर्जीवन बीमा समूह भने आज क्रमशः१.४३ र ०.२५ प्रतिशतले घटे ।

धेरै कारोबार गर्ने कम्पनीहरु

यो दिन सिईडिबि होल्डिङको सर्वाधिक सेयर कारोबार भयो । आज यो कम्पनीको ३६ करोड ५५ लाख बढीको कारोबार भयो । हिमालयन रि इन्स्योरेन्सको पनि आज ३५ करोड ६ लाख, ङादी ग्रुप पावरको २७ करोड ३२ लाख,एनआरएन इन्फ्रास्ट्रक्चरको २६ करोड ६६ लाख र हिमालयन पावर पार्टनरको २२ करोड ४९ लाख बढीको सेयर कारोबार भयो ।  

धरै कमाउने र गुमाउने कम्पनीहरु

आज नेप्सेमा कारोबार भएका २ वटा कम्पनीको सेयरमूल्यमा अपर सर्किट लाग्यो । आज विशाल बजार कम्पनी र सेन्ट्रल फाइनान्सको सेयरमूल्य १० प्रतिशतले बढ्यो ।  

हाथवे इन्भेष्टमेन्ट नेपालको सेयरमूल्य पनि आज ६.८३ प्रतिशत,ङादी ग्रुप पावरको ६.६० प्रतिशत र रिभर फल्स पावरको सेयरमूल्य ४.९७ प्रतिशतले बढ्यो ।  

बोटलर्स नेपाल(बालाजु)को सेयरमूल्य आज सर्वाधिक अर्थात १० प्रतिशत।ले घट्यो । बलेफि हाईड्रोको सेयरमूल्य पनि आज ४.५५ प्रतिशत र मानुषी लघुवित्तको सेयरमूल्य २.५२ प्रतिशतले घट्यो ।