हर्क साम्पाङले गरे दल दर्ता, पार्टीको नाम ‘श्रम संस्कृति पार्टी’

काठमाण्डौ । धरान उपमहानगरपालिकाका मेयर हर्क साम्पाङले नयाँ राजनीतिक यात्राको सुरुवात गरेका छन्। उनले असोज ७ गते निर्वाचन आयोगमा ‘श्रम संस्कृति पार्टी’ नामक दल दर्ताका लागि औपचारिक निवेदन दिएका छन्।

आयोग स्रोतका अनुसार निवेदन दर्ता भइसकेको छ र अहिले प्रारम्भिक अध्ययनको चरणमा छ। दसैँ बिदा सकिएपछि मात्र यसबारे औपचारिक प्रक्रिया अघि बढाइने बताइएको छ।

स्रोतका अनुसार साम्पाङले दलको अध्यक्ष आफैं रहने प्रस्तावसहित निवेदन पेश गरेका छन्।

धरानमा खानेपानीको समस्या समाधानका लागि श्रमदानमार्फत संघर्ष गरेका साम्पाङ त्यही मुद्दालाई मुख्य एजेन्डा बनाएर स्वतन्त्र उम्मेदवारको रुपमा मेयर बनेका थिए। मेयर भएपछि पनि उनले श्रमदानमार्फतै खानेपानी व्यवस्थापनमा योगदान दिएका छन्।

साम्पाङ पछिल्लो समय काठमाडौं आएर राष्ट्रिय राजनीतिमा पनि सक्रिय देखिएका थिए। जेनजी आन्दोलनमा समेत संलग्न उनीबारे सहमति जुट्न नसकेपछि नेतृत्व तहमा उनका लागि बाटो खुलेन।

समाजिक सञ्जालमा उनले मन्त्री बन्न विदेशी दूतावास धाउनुपर्ने चलनप्रति असहमति जनाउँदै आफू त्यस्तो अभ्यासका लागि तयार नरहेको स्पष्ट पारेका छन्।