राजीनामा दिएका सांसदलाई रातो पासपोर्ट र परिचयपत्र तुरुन्त बुझाउन रास्वपाको उर्दी

काठमाण्डौ । राष्ट्रिय स्वतन्त्र पार्टी (रास्वपा) ले आफ्ना पूर्वसांसदलाई रातो पासपोर्ट र सांसद परिचयपत्र संघीय संसद् सचिवालयमा बुझाउन विशेष निर्देशन दिएको छ। 

पार्टीका प्रवक्ता मनिष झाका अनुसार, आन्दोलनपछि राजीनामा दिएका सांसदहरूले जतिसक्दो चाँडो ती कागजात फिर्ता गर्नुपर्ने भनिएको हो।

‘जेनजी’को नेतृत्वमा सुशासन र प्रणालीगत परिवर्तनका लागि भएको आन्दोलनले ७५ जनाको ज्यान लिएको संवेदनशील क्षणमा रास्वपाले आफूलाई राष्ट्रिय शोकमा रहेको ठहर गरेको छ। यही सन्दर्भमा पार्टीले सबै संरचनालाई चाडपर्वसम्बन्धी कुनै कार्यक्रम आयोजना गर्दा पार्टीको नाम, ब्यानर वा झण्डा प्रयोग नगर्न स्पष्ट निर्देशन दिएको हो।

रास्वपाले वक्तव्यमार्फत भनेको छ, “यो हाम्रो लागि उत्सव होइन, शोकको समय हो। परिवर्तनको आन्दोलनमा प्राण गुमाएका सहयोद्धाहरूलाई सम्झेर हामी सबै तह–तप्कामा श्रद्धाञ्जली अर्पण गर्नुपर्छ।”

यसरी, रास्वपाले आफ्नो राजनीतिक आचरणलाई नै शोक, श्रद्धाञ्जली र उत्तरदायित्वको भावनासँग जोड्दै देशभरका कार्यकर्तालाई संयमता अपनाउन आह्वान गरेको छ।