सगरमाथा लुम्बिनी इन्स्योरेन्सको नाफा ४३.२९% ले घट्यो, इपीएस जम्मा २.८५ रुपैयाँ

काठमाण्डौ । सगरमाथा लुम्बिनी इन्स्योरेन्स कम्पनीले पौने ४ करोड रुपैयाँ नाफा कमाएको छ । कम्पनीले चालु आवको दोस्रो त्रैमाससम्म ३ करोड ७३ लाख ४४ हजार रुपैयाँ नाफा कमाएको हो ।  

गत आवको सोही अवधिसम्म भने कम्पनीले ६ करोड ५८ लाख ५३ हजार रुपैयाँ नाफा कमाएको थियो । यसर्थ गत कम्पनीको नाफा गत आवको तुलनामा ४३.२९ प्रतिशतल घटेको छ ।

सो अवधिसम्म कम्पनीले एक अर्ब १६ करोड ४५ लाख रपैयाँ बराबरको प्रिमियम संकलन गरेको छ । कम्पनीको यो व्यवसाय गत आवको तुलनामा ६१.९४ प्रतिशत बढी हो । गत आवको सोही अवधिसम्म कम्पनीले ७१ करोड ९१ लाख रुपैयाँ बराबरको प्रिमियम संकलन गरेको थियो ।  

कम्पनीको व्यवसाय बढेपनि आम्दानीमा संकुचन आउँदा नाफा प्रभावित बनेको हो । कम्पनीले दोस्रो त्रैमाससम्म लगानीमार्फत १३ करोड ७८ लाख रुपैयाँ मात्रै आम्दानी गरेको छ ।  

यो आम्दानी गत आवको सोही अवधिसम्मको तुलनामा ३३.८७ प्रतिशत कम हो । गत आवको सोही अवधिसम्म कम्पनीले २० करोड ८४ लाख रुपैयाँ आम्दानी गरेको थियो ।  

 

सो अवधिसम्म कम्पनीले १ अर्ब ८० करोड ९० लाख रुपैयाँ बराबरको बीमा दाबी भुक्तानी गरेको छ । यो रकम गत आवको तुलनामा १७.९५ प्रतिशत बढी हो । गत आवको दोस्रो त्रैमाससम्म कम्पनीले १ अ र्ब ५३ करोड ३८ लाख रुपैयाँ बराबरको भुक्तानी दिएको थियो ।  

साथै कम्पनीको चुक्तापूँजी २ अर्ब ६२ करोड रुपैयाँ पुगेको छ भने बीमा कोषको आकार १६.७४ प्रतिशत बढेर ७ अर्ब ८० करोड ८३ लाख रुपैयाँ पुगेको छ । यसका साथै महाविपत्ती कोषको आकार १.७५ प्रतिशत बढेर २१ करोड ७१ लाख रुपैयाँ संचित रहेको छ भने रिटेन्ड अर्निङमा १० करोड २९ लाख रुपैयाँ संचित रहेको छ ।

कम्पनीको प्रतिसेयर आम्दानी (इपीएस) घटेर २.८५ रुपैयाँ कायम भएको छ भने नेटवर्थ २२७.४३ रुपैयाँ पुगेको छ । साथै कम्पनीको मूल्य आम्दानी अनुपात २११.७४ गुणा, प्रतिसेयर कुल सम्पत्तिको मूल्य ५९१.७७ रुपैयाँ रहेको छ ।