डलर अर्बपति विनोद चौधरीले चुनाव हारे, विक्रम खनालले ५ गुणा मतान्तरले शानदार जित निकाले

काठमाण्डौ । नेपालका एक मात्र डलर अर्बपति व्यापारी विनोदकुमार चौधरीले निकै ठूलो मतान्तरले चुनाव हारेका छन् ।

नवलपरासी बर्दघाट सुस्ता पश्चिम क्षेत्र नम्बर १ बाट दोश्रो पटक नेपाली कांग्रेसबाट प्रतिनिधिसभा सदस्य निर्वाचन लडेका चौधरीले विजेताको भन्दा ५ गुणा कम मत ल्याएर चुनाव हारेका हुन् । 

उनी यसअघि सोही क्षेत्रबाट पहिलोपटक प्रत्यक्षतर्फ शानदार मतसहित निर्वाचित भएका थिए । कांगे्रसभित्र उनलाई यसपटक पनि सहजै जित निकाल्ने उम्मेद्वारको रुपमा हेरिएको थियो । तर, मतदाताले भने उनलाई रुचाएनन् ।  

सो क्षेत्रमा राष्ट्रिय स्वतन्त्र पार्टी(रास्वपा)का विक्रम खनाल निर्वाचित भए । 

खनाल ४५ हजार २४१ मतसहित निर्वाचित हुँदा चौधरीले भने ९ हजार ५०२ मत मात्रै पाए । यसरी करिब ३५ हजार मतले खनालले जित निकाले ।

तेश्रोमा एमालेका रामप्रसाद पाण्डेय रहे, जसले ७ हजार ९५६ मत ल्याए । जनता समाजवादी पार्टी नेपालका हृययेश त्रिपाठी ७ हजार ८३२ मतसहित चौथो र राप्रपाका नवनित कुमार मिश्रले एक हजार ५९३ मतसहित पाँचौ रहे ।