सर्लाही–४ मा पराजित भएपछि गगन थापाले माने हार, अमरेश सिंहलाई दिए बधाई

सर्लाही । नेपाली कांग्रेसका सभापति गगनकुमार थापाले सर्लाही–४ बाट प्रतिनिधिसभा निर्वाचनमा पराजित भएपछि आफ्नो हार स्वीकार गरेका छन्। उनले विजयी भएका डा. अमरेशकुमार सिंहलाई बधाई तथा शुभकामना दिएका छन्।

सामाजिक सञ्जालमार्फत प्रतिक्रिया दिँदै थापाले सर्लाही–४ बाट निर्वाचित भएकोमा सिंहलाई हार्दिक बधाई व्यक्त गरेका हुन्। उनले आफूलाई माया, विश्वास र मत दिने सम्पूर्ण मतदाताप्रति आभार प्रकट गरेका छन्।

थापाले निर्वाचन परिणाम जे भए पनि क्षेत्रका जनतासँग जोडिएका समस्या समाधानका लागि आफूले सक्ने पहल निरन्तर जारी राख्ने प्रतिबद्धता पनि व्यक्त गरेका छन्। उनले आफ्नो पहल र क्षमताभित्र रहेर सर्लाही–४ का जनताको पक्षमा काम गरिरहने बताएका छन्।

यसपटकको पराजयसँगै थापाको करिब १८ वर्ष लामो संसदीय यात्रामा विराम लागेको छ।