प्रतिनिधिसभा निर्वाचन (पहिलो संशोधन) विधेयक संसदमा पेस

काठमाण्डौं । सरकारले निर्वाचनसम्बन्धी कानूनी ढाँचा परिमार्जन गर्ने उद्देश्यसहित ‘प्रतिनिधिसभा सदस्य निर्वाचन (पहिलो संशोधन) विधेयक, २०८३’ प्रतिनिधि सभामा दर्ता तथा पेस गरेको छ।

बुधबार बसेको प्रतिनिधि सभा बैठकमा प्रधानमन्त्री बालेन्द्र साहको तर्फबाट कानून, न्याय तथा संसदीय मामिलामन्त्री सोविता गौतमले उक्त विधेयक औपचारिक रूपमा पेस गरेकी हुन्। 

विधेयकमार्फत निर्वाचन प्रक्रिया, व्यवस्थापन तथा कार्यान्वयन पक्षलाई थप व्यवस्थित र समसामयिक बनाउने लक्ष्य राखिएको छ।

त्यसैगरी सोही बैठकमा ‘मतदाता नामावली (पहिलो संशोधन) विधेयक, २०८३’ पनि पेस गरिएको छ।  

यस विधेयकले मतदाता नामावली संकलन, अद्यावधिक प्रक्रिया र मतदाता व्यवस्थापनलाई अझ सरल, पारदर्शी र प्रभावकारी बनाउने अपेक्षा गरिएको छ।

सरकारले दुवै विधेयकलाई निर्वाचन प्रणाली सुधारको महत्वपूर्ण कदमका रूपमा अघि सारेको छ।

कानूनी तथा प्रशासनिक प्रक्रियामा सुधार ल्याएर आगामी निर्वाचनलाई अझ विश्वसनीय र व्यवस्थित बनाउने उद्देश्य रहेको बताइएको छ।

यसैबीच, प्रतिनिधिसभाको अर्को बैठक आगामी जेठ ७ गते बिहीबार बिहान ११ बजे बस्ने गरी स्थगित गरिएको संसद् सचिवालयले जनाएको छ।