सेयरबजार घटेसँगै सरकारले प्राप्त गर्ने पूँजीगत लाभकरमा ३७% को गिरावट

काठमाण्डौ । सरकारले चालु आर्थिक वर्षको ११ महिनामा पूँजीबजारबाट ९ अर्ब ५४ करोड ४४ लाख रुपैयाँबराबरको पूँजीगत लाभकर उठाएको छ । यो रकम अघिल्लो आवको सोही अवधिको तुलनामा ३७.५ प्रतिशतले कम हो ।

गत आवको उक्त अवधिसम्म सरकारले पूँजीबजारबाट पूँजीगत करका रुपमा १५ अर्ब २७ करोड रुपैयाँ संकलन गरेको थियो ।

चालु आवको ११ महिनामध्ये सरकारले साउनमा सबैभन्दा बढी पूँजीगत लाभकर उठाएको छ । उक्त अवधिमा सरकारले २ अर्ब १५ करोड रुपैयाँ उठाएको थियो । यस्तै चैतमा पनि सरकारले १ अर्ब ७३ करोड उठाएको छ ।

यस्तै सरकारले भदौमा ६० करोड १४ लाख। असोजमा २४ करोड ३९ लाख, कात्तिकमा ३८ करोड ५ लाख, मंसिरमा ६२ करोड ९८ लाख, पुसमा ५८ करोड ४३ लाख, माघमा १ अर्ब २९ करोड, फागुनमा ५५ करोड १५ लाख र वैशाख महिनामा ९३ करोड ६१ लाख रुपैयाँ पूँजीगत लाभकर संकलन गरेको छ ।

पछिल्लो समय सेयरबजार निरन्तर घटेसँगै सरकारले यस क्षेत्रबाट प्राप्त गर्ने पूँजीगत लाभकरमा समेत गिरावट देखिएको हो ।