सिद्धार्थ इक्विटी फण्ड २ को इकाई बाँडफाँड

काठमाण्डौ । सिद्धार्थ इक्विटी फण्ड २ को इकाई बाँडफाँड भएको छ । सिद्धार्थ क्यापिटल लिमिटेडद्वारा निष्कासित उक्त योजना असार ४ गते बाँडफाँड गरिएको हो ।

सिद्धार्थ म्युचुअल फण्डअन्तर्गत सञ्चालन हुने १२ वर्षे बन्दमुखी यो योजनाको इकाई गत वैशाख २१ गतेदेखि वैशाख २८ गतेसम्म निष्कासन गरिएको थियो । प्रतिइकाई १० रुपैयाँ अंकित दरका कुल १० करोड इकाई निष्कासन भएको थियो। जसको कुल आकार १ अर्ब रुपैयाँ रहेको छ ।

उक्त अवधिमा मागभन्दा अधिक इकाई खरिदका लागि आवेदन प्राप्त भएकाले प्रचलित कानून बमोजिम योजनाको आकार २५ प्रतिशत थप गरी कुल १ अर्ब २५ करोडबराबरको १२ करोड ५० लाख इकाईहरु(बीज पूँजी समेत) कायम गरी निष्कासन अवधिभित्र प्राप्त भएको रितपूर्वक आवेदन दिने आवेदकहरुलाई इकाई बाँडफाँड गरिएको बिक्री प्रबन्धक सिद्धार्थ क्यापिटलले जनाएको छ ।

बाँडफाँड सम्बन्धी विवरण सिद्धार्थ क्यापिटलको वेबसाइट तथा सिडिएसद्वारा सञ्चालित वेबसाइटबाट हेर्न सकिने व्यवस्था गरिएको छ ।