ट्रम्पको जितसँगै विश्व सेयर बजारको उछालले ग्राउण्ड जिरोका लगानीकर्ता दंग, भन्छन्, ‘नेपालको पनि बढ्छ’

काठमाण्डौ । सधैंको साता जस्तै आज पनि हामीले नियमित स्तम्भ ग्राउण्ड जिरोलाई निरन्तरता दिएका छौं । आज हामीले काठमाण्डौ अनामनर आसपासका ब्रोकर हाउसहरुमा पुगेर लगानीकर्ता तथा ब्रोकर सञ्चालकहरुसँग बजारको विषयमा जानकारी लिएका छौं । आज हामी सबै भन्दा पहिले अनामनगरमा रहेको कालिक सेक्यूरिटिज (स्टक ब्रोकर नम्बर ४६) मा पुगेका थियौं ।  

चाडपर्वपछि खुलेको पहिलो कारोबार भएको कारण ब्रोकर हाउसमा आज लगानीकर्ताहरुको उपस्थिति राम्रै थियो । आज बिहानको सुरुवाती प्रहरदेखि नै बजारले निरन्तर गति लिएको थियो । केही लगानीकर्ताहरु चाडपर्वकै विषयमा गफगाफ गर्दै थिए भने केहीले अब सबै चाडपर्व सकिएका कारण बजार बढ्नुको बिकल्प नरहेको तर्क गर्दै थिए । यसै सिलसिलामा एक लगानीकर्ताले राम मन्दिरको प्रसाद खाँउ है साथिहरु भन्दै मिठाइ बाँडे । ‘लौ ! यो मिठाइ खाएपछि त अब बजार नबढि सुखै छैन,’ एक लगानीकर्ताले ठट्यौली पारामा भने ।  

यस बेलासम्म दिनको साढे ११ बजिसकेको थियो । सेयर बजार निरन्तर उकालो यात्रा तय गर्दै थियो । यत्तिकैमा एक लगानीकर्ताले डिस्प्लेमा हेर्दै भने ‘अब त साथिहरु चाडपर्व पनि सकिए । अमेरिकाको चुनाबमा डोनाल्ड ट्रम्पले राष्ट्रपतिको चुनाव जितेका छन् । अब विश्व युद्ध पनि टरेको छ ।’ उनले थप्दै भने, ‘ट्रम्पले युक्रेनका राष्ट्रपति जेलेस्किलाई फोन सम्पर्क गरे रे । यहि कारण विश्व सेयर बजारमा उछाल आएको छ । अब नेपालको बजार पनि बढ्छ ।’  

तर उनीसँगै बसेका लगानीकर्ता भने उनीसँग त्यति सहमत देखिएनन्  । सँगै बसेका साथिले भने, ‘अमेरिकाको चुनाबले हामीलाई केही फरक पर्दैन । यसले नेपालको बजार प्रभावित हुन्छ जस्तो लाग्दैन मलाई त ।’ उनलाई जबाफ दिँदै सँगै बसेका अर्का एक लगानीकर्ताले भने युद्ध नभए तेलको मूल्य घट्दै जान्छ । तेलको मूल्य घटेपछि महङ्गी पनि घट्दै जान्छ । नेपालमा पनि तरलता फालाफाल छ । यहि कारण अब बजार नबढि सुखै छैन । ब्रोकर हाउसहरुमा यस्तै गफगाफ चल्दै थिए । भित्ताको घडिमा दिनको १२ बज्दै थियो । बजार पनि बिस्तारै तल माथि गर्दै थियो ।  

हामी त्यहाँबाट अनामनगरमा नै रहेको इम्पेरियल सेक्यूरिटिज (स्टक ब्रोकर नम्बर ४५) मा पुग्यौं । यहाँ पनि लगानीकर्ताहरुको उपस्थिति राम्रै थियो । यस ब्रोकरमा भेटिएका लगानीकर्ताले अब हाईड्रो कम्पनीको सेयरमूल्य बढ्ने तर्क गर्दै थिए । केहीले सानिमा हाइड्रो चल्ने भन्दै थिए भने केहीले कम्पनीका साना प्रोजेक्ट सकिएका कारण चिलिमे जलविद्युत कम्पनी पनि चल्ने सक्ने आँकलन गर्दै थिए ।  

यस ब्रोकरमा पनि अब बजारले गति लिनेमा लगानीकर्ताहरु ढुक्क देखिन्थे । केही समयको बसाईपछि हामी अनामनगर मोडमा रहेको प्रिमिएर सेक्यूरिटिज (स्टक ब्रोकर नम्बर ३२) मा पुग्यौं । यहाँ पनि लगानीकर्ताहरुको उस्थिति राम्रै थियो । यहाँ भेटिएका लगानीकर्ताहरुले पनि अमेरिकामा डोनाल्ड ट्रम्पले चुनाब जितेको र नेपालमा पनि चाडपर्व  सकिएको कारण अब बजारले गति लिने तर्क गरे ।  

यसपछि हामी प्राइमो सेक्यूरिटिज (स्टक ब्रोकर नम्बर १६) मा पुग्यौं । यहाँ पनि लगानीकर्ताको उपस्थिति सामान्य थियो । यहाँ भेटिएका लगानीकर्ताहरु पनि अब चाडपर्व सकिएका कारण  बजार बढ्नेमा ढुक्क देखिए । यसै ब्रोकरमा भेटिएका एक लगानीकर्ता भन्दै थिए, ‘सेयर भनेको खेलाडी लागेको नै किन्नु पर्ने रहेछ । राम्रा भनेर किनेका सेयर वर्षौ पाल्दा पाल्दा हैरान भईयो ।’