बोइङको ‘७७७एक्स’को परीक्षण उडान पुनःसुरु

काठमाण्डौ । विमान निर्माता कम्पनी बोइङले लामो समयदेखि रोकिएको वाइडबडी विमान ‘७७७एक्स’को परीक्षण उडान बिहिबारदेखि पुनःसुरु गरेको छ । पहिलो उडानमा इन्जिनमा समस्या देखिएपछि कम्पनीले यो विमानलाई गत अगस्टदेखि ग्राउण्डेड गरेको थियो ।  

कम्पनीले ‘७७७–९’का लागि सर्टिफिकेशन फ्लाइट सुरुवात गरेको पाँच सातापछि ‘७७७एक्स’लाई ग्राउण्डेड गरेको थियो ।

बिहिबारको परीक्षणमा अमेरिकी फेडरल एभिएसनका पदाधिकारीहरु विमानमा नरहेको कम्पनीले जनाएको छ । ‘७७७एक्स’ बोइङको विमान ७७७ को उत्तराधिकारीको रुपमा रहेको छ । बोइङको ७७७ लामो समयदेखि व्यवसायिक रुपमा सफल विमान हो । सुरुवातमा कम्पनीले सन् २०२० देखि कतार एयरवेजलाई ७७७एक्सको पहिलो आपूर्ति गर्ने योजना बनाएको थियो ।  

तर ७७७–९ को पहिलो डेलिभरी २०२६का लागि धकेलिएको छ । यस्तै सानो आकारको ७७७–८ र फ्राइटर भर्जनको डेलिभरी भने एक दशकपछि धकेलिएको छ ।  

बोइङको ७७७एक्सको ग्राहकहरु,इमिरेट्स,लुफ्त्साना,सिङ्गापुर एयरलाइन्स र क्याथे प्यासेफिक एयरवेज हुन् । बोइङले ७७७एक्सको ४८१ वटा अर्डर पाईसकेको छ । जसमा १७० वटा इमिरेट्सबाट र ६० वटा कतार एयरवेजबाट पाएको छ ।  

बोइङको ७७७–९ को परीक्षण विमानले बिहिबार बोइङ फिल्डदेखि वासिङटनको मोसेस लेकसम्म रिर्टन उडान गरेको छ ।