यूएईले लिन थाल्यो भिजिट भिसाको आवेदन, कामदार भिसा खुल्ने समेत अनिश्चित

काठमाण्डौ । करिब दुई महिनादेखि रोकिएको संयुक्त अरब इमिरेट्स (यूएई)को भिजिट भिसा आवेदन प्रक्रिया पुनः खुला भएको छ। बिहीबारदेखि यूएई सरकारले नयाँ आवेदन लिन सुरु गरेको हो।

केही ट्राभल एजेन्सीका सञ्चालकहरुले बिहीबारदेखि यूएईले भिजिट भिसा आवेदन लिन थालेको बताएका छन् । तर, रोजगारी (वर्किङ) भिसा भने अझै खुलाइएको छैन ।  

यूएई सरकारले यो विषयमा औपचारिक सूचना न त दूतावासमार्फत दिएको छ, न त सार्वजनिक विज्ञप्ति नै जारी गरेको छ।

यूएईले भदौ २४ गतेको हिंसात्मक प्रदर्शनपछि भिजिट र वर्किङ भिसा रोक गरेको थियो। उक्त घटनामा जेलबाट कैदीहरू फरार भएपछि सरकारले अस्थायी रूपमा नेपालीहरूका लागि भिसा नदिने निर्णय गरेको थियो।

नेपालका लागि यूएई प्रमुख वैदेशिक रोजगारी गन्तव्य हो। 

औपचारिक रोजगारी भिसाबाहेक भिजिट भिसाको सहारामा पनि दैनिक करिब २०० जना नेपाली यूएई जाने गरेको अनौपचारिक तथ्यांकले जनाउँछ।

भिजिट भिसा पुनः सुरु भएपछि पर्यटन तथा पारिवारिक भ्रमणका लागि यूएई जान इच्छुक नेपालीहरूका लागि यो सकारात्मक खबर बनेको छ। तर, रोजगारीका लागि भिसा कहिले खुल्ने भन्ने विषयमा भने अझै स्पष्टता आएको छैन।