सुकेटार विमानस्थल पुनः सुचारु

काठमाण्डौ । मौसम प्रतिकूलताका कारण तीन हप्तादेखि अवरुद्ध ताप्लेजुङको सुकेटार विमानस्थलको उडान सोमबारदेखि पुनः सुचारु भएको छ।

सोमबारको उडानले काठमाण्डौबाट १३ यात्रु लिएर ताप्लेजुङ पुगेको थियो भने फर्किँदा ११ यात्रु बोकेर गएका थिए।

यदि मौसम अनुकूल रह्यो भने अब उडान नियमित तालिकाअनुसार सञ्चालन हुने जनाइएको छ। चैत पहिलो सातादेखि लगातार वर्षा, बाक्लो हुस्सु र कुहिरोका कारण उडान अवरुद्ध भएको थियो।

उडान अवरुद्ध हुँदा ताप्लेजुङ आउने–जाने यात्रु असुविधामा परेका थिए भने पर्यटकीय क्षेत्र पनि प्रभावित भएको थियो। वायुसेवा निगमले ट्विनअटर जहाजमार्फत हप्तामा सोमबार, बुधबार र शुक्रबार काठमाण्डौ–ताप्लेजुङ–काठमाडौँ उडान सञ्चालन गर्दै आएको छ।