लेबनानमा इजरायलको भीषण आक्रमण, २५० भन्दा बढीको मृत्यु

काठमाण्डौ । लेबनानमा जारी द्वन्द्वबीच इजरायलले बुधबार अहिलेसम्मकै सबैभन्दा ठूलो हवाई आक्रमण गरेको छ, जसमा २५० भन्दा बढी मानिसको ज्यान गएको छ भने एक हजारभन्दा बढी घाइते भएका छन्। इरान समर्थित समूह हिज्बुल्लाहले छोटो विरामपछि पुनः उत्तरी इजरायलमा रकेट आक्रमण सुरु गरेपछि स्थिति थप तनावपूर्ण बनेको छ।

इजरायली सेनाका अनुसार बेरुत, बेका उपत्यका र दक्षिणी लेबनानमा १० मिनेटभित्र १०० भन्दा बढी हिज्बुल्लाहका कमाण्ड केन्द्र र सैन्य संरचनामा आक्रमण गरिएको थियो। राजधानी बेरुतमा मात्रै ९० भन्दा बढी मानिसको मृत्यु भएको जनाइएको छ।

लेबनानको नागरिक रक्षा निकायले देशभर २५४ जनाको मृत्यु भएको पुष्टि गरेको छ भने स्वास्थ्य मन्त्रालयले १८२ जनाको मृत्यु भएको प्रारम्भिक तथ्यांक सार्वजनिक गरेको छ। घाइतेहरूको संख्या १ हजार १०० नाघेको छ।

आक्रमणपछि उद्धार कार्यमा संलग्न टोलीहरूले गम्भीर क्षति पुगेका भवनहरूबाट मानिसहरूलाई उद्धार गरेका छन्। एम्बुलेन्स अभावका कारण सर्वसाधारणले मोटरसाइकलमार्फत घाइतेलाई अस्पताल पुर्‍याएको दृश्य पनि देखिएको छ। केही प्रमुख अस्पतालहरूले सबै रक्त समूहको तत्काल आवश्यकता रहेको बताएका छन्।

संयुक्त राष्ट्रसंघका मानव अधिकार प्रमुख भोल्कर टर्कले घटनालाई भयानक भन्दै केही घण्टाअघि मात्रै इरानसँग भएको युद्धविरामको सन्दर्भमा यस्तो हिंसा हुनु आश्चर्यजनक भएको टिप्पणी गरेका छन्।

इजरायलका प्रधानमन्त्री बेन्जामिन नेतान्याहूले लेबनान उक्त युद्धविरामको हिस्सा नभएको स्पष्ट पार्दै हिज्बुल्लाहविरुद्ध कारबाही जारी रहने बताएका छन्। अमेरिकी प्रशासनले पनि लेबनान उक्त सहमतिमा समावेश नभएको जनाएको छ।

उता, हिज्बुल्लाहले इजरायलको आक्रमणलाई बर्बर भन्दै जवाफी कारबाही जारी रहने चेतावनी दिएको छ। इरानको रिभोल्युसनरी गार्ड्सले पनि लेबनानमाथि आक्रमण नरोकिए कडा प्रतिक्रिया दिने चेतावनी दिएको छ।

लेबनानका राष्ट्रपति जोसेफ आउनले आक्रमणको निन्दा गर्दै अन्तर्राष्ट्रिय पहलमार्फत युद्धविराम विस्तार गर्नुपर्ने बताएका छन्। फ्रान्सका राष्ट्रपति इम्यानुएल म्याक्रोंले यस विषयमा कूटनीतिक प्रयास गर्ने प्रतिबद्धता व्यक्त गरेका छन्।