१० महिनामा भद्रपुर राजस्व कार्यालयले उठायो रु ३ अर्ब ६१ करोड राजस्व, लक्ष्यको ८२ प्रतिशत मात्र राजस्व सङ्कलन

काठमाण्डौं । आन्तरिक राजस्व कार्यालय भद्रपुरले चालू आर्थिक वर्ष २०८२/८३ को पहिलो १० महिनामा रु तीन अर्ब ६१ करोड ८४ लाख २२ हजार राजस्व सङ्कलन गरेको जनाएको छ ।  

कार्यालयका अनुसार यो रकम उक्त अवधिका लागि निर्धारण गरिएको कुल लक्ष्यको ८२ दशमलव २१ प्रतिशत हो । 

अपेक्षित राजस्व सङ्कलन नहुँदा लक्ष्य र वास्तविक सङ्कलनबीच उल्लेख्य अन्तर देखिएको छ ।

कार्यालयले सार्वजनिक गरेको तथ्याङ्कअनुसार चालू आर्थिक वर्षको वैशाख मसान्तसम्म रु चार अर्ब ४० करोड १५ लाख ४० हजार राजस्व सङ्कलन गर्ने लक्ष्य तय गरिएको थियो ।  

तर, आर्थिक गतिविधिमा देखिएको सुस्तता, बजार कारोबारमा आएको कमी, उद्योग–व्यवसायमा परेको प्रभाव तथा करदाताको भुक्तानी क्षमतामा आएको गिरावटका कारण लक्ष्यअनुसार राजस्व उठ्न नसकेको कार्यालयको भनाइ छ ।

कार्यालयका कर अधिकृत डिल्लीराम चम्लागाईका अनुसार पछिल्लो समय आर्थिक गतिविधि पूर्ण रूपमा चलायमान हुन नसक्दा राजस्व सङ्कलनमा प्रत्यक्ष असर परेको छ ।  

उनले केही क्षेत्रबाट राजस्व सङ्कलनमा सुधार देखिए पनि समग्र लक्ष्य हासिल गर्न अझै चुनौती रहेको बताए ।  

उनका अनुसार बजारमा लगानी विस्तार, व्यापारिक कारोबार र उपभोग वृद्धिसँगै राजस्व वृद्धि हुने अपेक्षा गरिएको भएपनि आर्थिक मन्दीको प्रभाव अझै कायम रहेको छ ।

कार्यालयका अनुसार वैशाख महिनामा मात्र रु ४२ करोड ८५ लाख ६३ हजार राजस्व सङ्कलन गर्ने लक्ष्य राखिएको थियो ।

तर, सो अवधिमा लक्ष्यको ८३ दशमलव ८७ प्रतिशत मात्र राजस्व उठेको छ ।  

मासिक लक्ष्यअनुसार राजस्व सङ्कलन हुन नसक्दा वार्षिक लक्ष्य प्राप्तिमा समेत दबाब बढ्दै गएको कार्यालयले जनाएको छ ।

राजस्व शीर्षकअनुसार हेर्दा आयकरबाट सबैभन्दा बढी रकम सङ्कलन भएको छ ।

चालू आर्थिक वर्षको वैशाख मसान्तसम्म आयकर शीर्षकबाट रु एक अर्ब ६८ करोड ६८ लाख ६७ हजार राजस्व सङ्कलन भएको कार्यालयले जनाएको छ ।  

 

त्यस्तै, मूल्य अभिवृद्धि कर (भ्याट) बाट रु एक अर्ब २८ करोड ८० लाख १० हजार राजस्व उठेको छ भने अन्तःशुल्क शीर्षकबाट रु ४९ करोड ९७ लाख ३२ हजार राजस्व सङ्कलन भएको छ ।

कार्यालयले करदाताको दायरा विस्तार गर्न विभिन्न अभियान सञ्चालन गरिरहेको जनाएको छ ।  

कर चुहावट नियन्त्रण, नियमित बजार अनुगमन, व्यवसायहरूको निगरानी तथा कर शिक्षा कार्यक्रमलाई प्राथमिकताका साथ अघि बढाइएको कार्यालयले जानकारी दिएको छ ।  

व्यवसायी तथा सेवाग्राहीलाई समयमै कर बुझाउन प्रोत्साहन गर्न सचेतनामूलक कार्यक्रम पनि सञ्चालन भइरहेको जनाइएको छ ।

यसैबीच, कर प्रशासनलाई थप आधुनिक र पारदर्शी बनाउन डिजिटल प्रणालीको प्रयोग बढाइएको कार्यालयले जनाएको छ ।  

कर विवरण अनलाइनमार्फत पेश गर्ने व्यवस्था, विद्युतीय भुक्तानी प्रणाली तथा डिजिटल सेवा विस्तारले करदातालाई सहजता मिलेको कार्यालयको दाबी छ ।  

साथै, कर प्रशासनलाई प्रविधिमैत्री बनाउने उद्देश्यले विभिन्न सुधारका कार्यक्रम लागू गरिएको बताइएको छ ।

आन्तरिक राजस्व कार्यालय भद्रपुरले आगामी महिनाहरूमा राजस्व सङ्कलनलाई थप प्रभावकारी बनाउन निगरानी, अनुगमन र कर प्रशासन सुधारका कार्यक्रमलाई तीव्रता दिने जनाएको छ ।  

राजस्व सङ्कलन सरकारको विकास निर्माण, सार्वजनिक सेवा प्रवाह तथा समग्र आर्थिक व्यवस्थापनसँग प्रत्यक्ष रूपमा जोडिएको विषय भएकाले लक्ष्यअनुसार राजस्व वृद्धि गर्न विशेष पहल गरिने कार्यालयले स्पष्ट पारेको छ ।