वीरगन्ज नाकाबाट ईभी आयातमा उल्लेख्य वृद्धि, राजस्व अढाइ गुणाले बढ्यो

काठमाण्डौं । नेपालको प्रमुख आयात नाका वीरगन्ज नाका हुँदै चालू आर्थिक वर्ष २०८२/८३ मा विद्युतीय सवारीसाधन (ईभी) को आयात उल्लेख्य रूपमा बढेको छ ।  

विशेषगरी मध्यम क्षमताका विद्युतीय कार र दुईपांग्रे ईभीप्रति उपभोक्ताको आकर्षण बढ्दै जाँदा आयात र राजस्व दुवैमा ठूलो उछाल देखिएको हो ।

वीरगन्ज भन्सार कार्यालय का अनुसार चालु आर्थिक वर्षको वैशाख मसान्तसम्म ईभी आयात अघिल्लो वर्षको तुलनामा झण्डै डेढ गुणाले बढेको छ भने राजस्व संकलन करिब अढाइ गुणाले वृद्धि भएको छ ।

भन्सार तथ्यांकअनुसार ५१ देखि १०० किलोवाट क्षमताका विद्युतीय कार, जीप र भ्यानको आयात सबैभन्दा धेरै बढेको छ ।  

गतवर्ष सोही अवधिमा केवल ६ वटा यस्ता सवारी आयात भएकोमा यस वर्ष ६५७ वटा आयात भएका थिए ।  

यसले नेपाली बजारमा मध्यम क्षमताका ईभीप्रति माग तीव्र रूपमा बढिरहेको संकेत गरेको छ ।

त्यस्तै विद्युतीय मोटरसाइकल र स्कुटरको आयात पनि उल्लेख्य रूपमा बढेको छ ।  

गतवर्ष वैशाखसम्म ४ हजार ८३४ वटा आयात भएकोमा यस वर्ष बढेर ८ हजार ८६७ पुगेको छ ।  

तीनपांग्रे विद्युतीय अटोको आयात पनि वृद्धि भएको छ । गत वर्ष १ हजार १३३ वटा आयात भएकोमा यस वर्ष १ हजार ६५४ वटा भित्रिएका छन् ।

अनअसेम्बल्ड विद्युतीय तीनपांग्रे सवारीको आयातमा समेत तीव्र वृद्धि देखिएको छ ।  

गत वर्ष ६४० वटा आयात भएकोमा यस वर्ष २ हजार ४० वटा पुगेको छ ।  

यसलाई नेपालमै ईभी एसेम्बलिङ र साना उद्योग विस्तारको संकेतका रूपमा पनि हेरिएको छ ।

तर, सबै श्रेणीका ईभीमा भने समान वृद्धि देखिएको छैन । ५० किलोवाटसम्म क्षमताका साना ईभी कारको आयात घटेको छ ।

गतवर्ष १४१ वटा आयात भएकोमा यसवर्ष केवल १८ वटा मात्रै आयात भएका छन् ।  

त्यस्तै २०१ देखि ३०० किलोवाट क्षमताका उच्च शक्तिका ईभी पनि १५ बाट घटेर २ वटामा सीमित भएका छन् ।

भन्सार कार्यालयका अनुसार चालू आर्थिक वर्षको वैशाखसम्म वीरगन्ज नाकाबाट कुल १५ हजार २७१ वटा विद्युतीय सवारीसाधन आयात भएका छन् ।  

ती सवारीबाट २ अर्ब २ करोड १५ लाख रुपैयाँ राजस्व संकलन भएको छ ।  

गतवर्ष सोही अवधिमा ९ हजार ४२ वटा ईभी आयात हुँदा ८१ करोड ४७ लाख रुपैयाँ मात्रै राजस्व उठेको थियो ।

वीरगन्ज उद्योग वाणिज्य संघका अध्यक्ष हरि गौतमका अनुसार पेट्रोलियम पदार्थको मूल्यवृद्धि, चार्जिङ पूर्वाधार विस्तार तथा ईभीप्रति बढ्दो जनचेतनाका कारण नेपालमा विद्युतीय सवारीको माग तीव्र रूपमा बढ्दै गएको छ ।  

उनका अनुसार बजारमा अहिले मध्यम मूल्य र मध्यम क्षमताका ईभीप्रति उपभोक्ताको आकर्षण सबैभन्दा धेरै देखिएको छ ।

पछिल्लो तथ्यांकले नेपालमा सवारी बजार विस्तारै पेट्रोल–डिजेलबाट विद्युतीयतर्फ मोडिन थालेको स्पष्ट संकेत दिएको विश्लेषण गरिएको छ ।