आन्दोलन अन्त्य गर्न बोइङले अघि सार्यो नयाँ प्रस्ताव, सेयरमूल्यमा वृद्धि

काठमाण्डौ । बोइङका आन्दोलनरत कर्मचारीहरुले आगामी ४ वर्षसम्मका लागि ३८ प्रतिशत तलब बढाउने कम्पनीको नयाँ प्रस्तावमा मतदान गर्ने भएका छन् । ३० हजार भन्दा बढी आन्दोलनरत कर्मचारीको प्रतिनिधित्व गर्ने ‘इन्टरनेशनल एसोशिएसन अफ मेशिनिष्ट एण्ड एरोस्पेश वकर्स(आईएएम)युनियनले कम्पनीको यो नयाँ प्रस्तावको समर्थन गरेको छ । 

यस्तै,युनियनले आगामी सोमबार आफ्ना सदस्यहरुबीच यस विषयमा मतदान गर्ने जनाएको छ ।  

पारिश्रमिकको विषयमा बोइङमा गत सेप्टेम्बर १३ देखि आन्दोलन सुरु भएको थियो । जसका कारण कम्पनीको उत्पादनमा नाटकिय कमी आउनुका साथै कम्पनीमा संकटको अवस्था सिर्जना भएको छ ।  

युनियनले पहिल्लोसमय ४० प्रतिशत पारिश्रमिक वृद्धिको प्रस्ताव गरेको थियो । कामदारहरुले यसअघिको ३५ प्रतिशत पारिश्रमिक वृद्धिको अन्तिम प्रस्ताव सहित अघिल्लो दुईवटा प्रस्ताव अस्वीकार गरेका थिए ।  

नयाँ प्रस्ताव घोषणा भएसँगै कम्पनीको सेयरमूल्य २.७ प्रतिशतले बढेको छ । कम्पनीले लामो समयदेखिको आन्दोलन अन्त्य गर्दै वित्तीय अवस्थामा सुधार ल्याउन चाहेको जनाइएको छ । गत साता कम्पनीले २० अर्ब डलर जुटाउन सेयर बिक्री गर्ने योजना समेत सार्वजनिक गरेको थियो ।