यो साता नेप्सेमा ‘सिमेट्रिकल प्याटर्न’को ‘लोअर ट्रेन्डलाइन’ ब्रेकडाउन, कस्तो रहला आगामी यात्रा ?

काठमाण्डौ । यो साता सेयर बजारमा ५ दिन कारोबार भयो । पाँच दिनमा बजार ४ दिन घट्यो भने १ दिन मात्रै बढ्यो । अघिल्लो साता २ हजार ७३५ को विन्दुमा बन्द भएको बजार यो साता २ हजार ६८२.२९ को विन्दु्मा बन्द भयो । यस हिसाबले समग्रमा यो साता ५२ अंकले बजार घट्यो ।  

यो साता पाँच दिन कारोबारमा २८ अर्ब ६९ करोड कारोबार भयो । अघिल्लो साता ५ दिनको कारोबारमा ४४ अर्ब ४९ करोडबराबरको कारोबार भएको थियो । यस हिसाबले यो साता बजार घट्दा कारोबार पनि घट्यो । यो साता बजार पूँजीकरण ४४ खर्ब ४९ अर्ब रह्यो । यस्तो बजार पूँजीकरण अघिल्लो साता ४५ खर्ब ४९  अर्ब रहेको थियो । यस हिसाबले यो साता बजार घट्दा बजार पूँजीकरण ८१ अर्बले घटेको छ ।  

प्राबिधिक पक्षः  

सिमेट्रिकल प्याटर्न  

यो साताको बजारलाई सिमेट्रिकल प्यार्टनमार्फत नियाल्दा लोअर ट्रेन्ड लाइन ब्रेक गरेको छ । पटक–पटक २७८० को विन्दु अर्थात अपर ट्रेन्डलाईनमा प्रतिरोध सामना गरेको बजारले यो साता भने २७ सय विन्दुभन्दा तल बन्द भएको छ । यो सँगै नेप्सेमा लोअर ट्रेन्ड लाइन ब्रेक डाउन भएको छ । बजारलाई साप्ताहिक रुपमा पनि क्याण्डल स्टिकमार्फत नियाल्दा इभिनिङ स्टार बनेको छ ।  

डेली बेसमा क्याण्डल स्टिकमार्फत नियाल्दा पनि डार्क क्लाउड कभर प्याटर्न बनेको छ । यसले पनि बजारमा सम्भावित रुपमा बिक्री दबाब पर्दै गरेको देखिन्छ । समग्रमा बजारलाई विभिन्न क्याण्डल स्टिक प्याटर्नमार्फत नियाल्दा यो साताको बजारले बिक्री दबाब परेको र केही समय अझै अल्पकालिन दबाब पर्न सक्ने देखिन्छ ।  

बोलिङ्गर ब्याण्ड, म्याक्डी र आरएसआई

बोलिङ्गर ब्याण्डको आधारमा यो साताको बजारलाई नियाल्दा मध्य ब्याण्डबाट तल खसेको छ । यद्यपी लोअर ब्याण्डलाई ब्रेक डाउन भने गरेको अवस्था छैन ।  म्याक्डीमा पनि लोअर लो बनेको छ । आरएसआई ६० को तहबाट खसेर न्यूट्रल जोनमा चलेको छ । समग्रमा सबै इन्डिकेटरबाट नियाल्दा यो साता बजारमा बिक्री दबाब परेको देखिन्छ ।  

पिभट् प्वइन्टः  

पिभट् विश्लेषण भनेको सेयर तथा डेरिभेटिभको अधिकतम, न्यूनतम र अन्तिम मूल्यलाई आधार मानी यसको भविष्यमा हुने मूल्यको उतारचढाव निकालिन्छ ।  

बढेमा प्रतिरोध  

प्रतिरोध ३ – २९३७

प्रतिरोध २ – २८५९

प्रतिरोध १–  २८०३

पिभट् प्वइन्टः २७३२

घटेमा सपोर्ट  

सपोर्ट १– २६७६

सपोर्ट २– २६०५

सपोर्ट  ३ –२५४९

निष्कर्ष ः यो साता नेप्सेमा ५२ अंकको गिरावट आयो । अघिल्लो साता बजार १२ अंकले घटेको थियो  । डेली बेसमा बजारलाई बोलिङ्गर ब्याण्डबाट नियाल्दा यो साता बजारले मध्य ब्याण्ड भन्दा तल खसेको छ । आरएसआई न्यूट्रल जोन ४५ मा चलको देखिन्छ । मूभिङ एभरेजबाट नियाल्दा पनि बजारले ५० दिने मूभिङ एभरेजमा सपोर्ट लिएको छ ।  

पिभट्बाट नियाल्दा बजार पिभट् प्वइन्ट २७३२ विन्दुभन्दा तल खसेको  छ । कारोबार तथा भोल्युमबाट नियाल्दा पनि बजार यो साता दैनिक औषत ५.५ अर्बमा सीमित बनेको  छ । ट्रेन्डलाइन मार्फत नियाल्दा सिमेट्रिकल ट्रेन्ड  लाइनको तल्लो लाइनलाई ब्रेक डाउन गरेको छ । यसर्थ यो साता नेप्सेमा बिक्री दबाब परेको देखिन्छ भने आगामी साताहरुमा पनि यदि बजार पिभट् प्वइन्ट २७३२ विन्दुभन्दा माथि जाँदैन भने माथि भन्दा तलकै सम्भावना बढी रहन्छ ।  

नोटः सेयर बजारमा लगानी जोखिमपूर्ण हुन्छ । यो विश्लेषण कारोबारका लागि सिफारिस भने होइन ।