पाकिस्तानको राष्ट्रिय एयरलाइन्स दुई दशकमा पहिलोपटक नाफामा

काठमाण्डौ । पाकिस्तानको राष्ट्रिय ध्वजावाहक हवाई कम्पनी पीआईए होल्डिङ दुई दशकमा पहिलोपटक नाफामा गएको छ ।  

कम्पनीले डिसेम्बर महिनामा अन्त्य भएको वर्षमा ५.०१ पाकिस्तानी रुपैयाँ ईपीएस हासिल गरेको ब्लूमबर्गले जनाएको छ । ब्लूमबर्गले फेला पारेको अडिट गरिएको वित्तीय विवरण अनुसार कम्पनी सन् २००३ पछि पहिलोपटक वार्षिक नाफा आर्जन भएको जनाइएको छ । वित्तीय विवरण भने एयरलाइन्सको सञ्चालक समितिले अनुमोदन गरेपछि सार्वजनिक गरिने ब्लूमबर्गले जनाएको छ । यससम्बनधी पीआइएले कुनैपनि प्रतिक्रिया दिएको छैन ।  

निरन्तर घाटामा गईरहेको कम्पनीको विमानहरु पछिल्लो समय विदेशी विमानस्थलमा रोकिने,उडान रद्द हुने र कम्पनी टाट पल्टने अवस्थासम्म पुगेको छ । सरकाररले आर्थिक सहायता प्रदान गरिरहेका कारण कम्पनीको सञ्चालन भईरहेको छ । तर उक्त सहायता समेत अब बन्द हुने अवस्थामा पुगेको छ ।  

पाकिस्तानले गत वर्ष एयरलाइन्स बिक्री गर्ने प्रयास गरेको थियो, तर त्यसमा सफल भने हुन सकेन । बिक्रीका लागि न्यूनतम ३०६ मिलियन डलर मूल्य तोकिएको थियो । पाकिस्तान सरकारले एयरलाइन्स बिक्रीका लागि यसै महिना पुनःलिलामी प्रक्रिया अघि बढाउदैछ ।