बहुमत जुट्यो भने नयाँ युग, नत्र फुटको खतरा: कांग्रेसको परीक्षा आज

काठमाण्डौ । नेपाली कांग्रेसको दोस्रो विशेष महाधिवेशन आज (पुस २७, २०८२) देखि काठमाडौंको भृकुटीमण्डपमा सुरु भएको छ।  

यो महाधिवेशन नेपाली कांग्रेसको इतिहासमा दोस्रो विशेष महाधिवेशन हो, जसलाई पार्टीभित्र युवा नेतृत्वको विद्रोहको रूपमा हेरिएको छ।

विशेष महाधिवेशनमा सहभागी हुन महाधिवेशन प्रतिनिधिहरूको नाम दर्ता प्रक्रिया बिहान सवा ८ बजेदेखि नै धमाधम चलिरहेको छ। उपलब्ध जानकारीअनुसार १८०० भन्दा बढी प्रतिनिधिले आफ्नो नाम दर्ता गराइसकेका छन् । देशभरबाट कुल ४,७४३ जना महाधिवेशन प्रतिनिधि छन्। यदि यो क्रम जारी रहे यो विशेष महाधिवेशनमा सहभागी हुने प्रतिनिधिहरुको संख्या बहुमत पुग्ने बलियो सम्भावना देखिएको छ।

विशेष महाधिवेशन पक्षधरहरूले ६० प्रतिशतभन्दा बढी प्रतिनिधिको सहभागिता हुने दाबी गरेका छन्। यसअघि गत असोज २९ मा ५४.५८ प्रतिशत प्रतिनिधिले विशेष महाधिवेशन माग गर्दै हस्ताक्षर गरेका थिए। विधानको धारा १७ (२) अनुसार ४० प्रतिशतले माग गरेमा तीन महिनाभित्र विशेष महाधिवेशन आह्वान गर्नुपर्ने व्यवस्था छ। संस्थापन पक्षको बेवास्तापछि महामन्त्रीद्वय गगनकुमार थापा र विश्वप्रकाश शर्माको अगुवाइमा यो महाधिवेशन आयोजना भएको हो।

यो महाधिवेशनमा सभापति शेरबहादुर देउवा, कार्यवाहक सभापति पूर्णबहादुर खड्का लगायत पुराना नेताहरूको सहभागिता नहुने देखिएको छ, जसले पार्टीभित्रको गहिरो विभाजनलाई उजागर गरेको छ।

मुख्य प्रश्नहरू यसरी उठेका छन्:

-के यो विशेष महाधिवेशनबाट बहुमत प्रतिनिधिको सहभागिता जुटेर पार्टीको रूपरेखा नै फेरिन्छ ?

-युवा नेतृत्वको यो विद्रोहले कांग्रेसलाई नयाँ शक्ति प्रदान गर्ला वा फुटको खतरा झन् बढाउँछ ?

-के यो महाधिवेशनले पार्टीमा पुनर्जागरण ल्याउँछ वा आन्तरिक द्वन्द्वलाई थप जटिल बनाउँछ ?

प्रतिनिधिहरूले नाम दर्ता गर्न परिचयपत्र, पासपोर्ट साइज फोटो र १,००० रूपैयाँ शुल्क लिएर आउनुपर्ने व्यवस्था छ। सातवटै प्रदेशका लागि छुट्टाछुट्टै डेस्क राखेर दर्ता प्रक्रिया जारी छ।

यो महाधिवेशनले नेपाली कांग्रेसको भविष्यको दिशा निर्धारण गर्न महत्वपूर्ण भूमिका खेल्ने देखिन्छ। बहुमत जुट्यो भने युवा नेतृत्वले पार्टीमा ठूलो परिवर्तन ल्याउने सम्भावना छ, नत्र आशंका गरिएजस्तै फुट वा थप संकट निम्तिन सक्छ।

शब्द/तस्विर: दिनेश सार्की, बिजशाला