गणपति लघुवित्तको कुश्मा शाखाद्वारा वित्तीय साक्षरता कार्यक्रम सम्पन्न

काठमाण्डौ । गणपति लघुवित्त वित्तीय संस्थाको शाखा कार्यालय कुश्मा पर्वतद्वारा आयोजित एकदिने वित्तीय साक्षरता कार्यक्रम माघ १३ गते मंगलबारका दिन कुश्मा नगरपालिका–४ का वडाध्यक्ष दिनेश श्रेष्ठको प्रमुख आतिथ्यतामा कुश्मा पर्वतमा सम्पन्न भएको छ ।

प्रमुख अतिथि वडाध्यक्षले लघुवित्त कार्यक्रमले साना सानो कर्जा लगानी गरि धेरैको जीवनमा सकारात्मक परिवर्तन गरेको र यसको बारेमा आफुले अध्ययन गर्दा धेरै राम्रो उदेश्यले स्थापना भई सञ्चालन भएकोले आजको यो वित्तीय साक्षरता कार्यक्रमबाट सहभागीलाई सबैलाई महत्त्वपूर्ण विषयहरुको ज्ञान लिएर जान आग्रह गरे ।

संस्थामा आबद्ध ग्राहक सदस्यहरुमा वित्तीय सचेतना तथा वित्तीय शिक्षा सम्बन्धि विशेष प्रस्तुती सहितको प्रशिक्षण संस्थाको तालिम, अनुपालना तथा प्रर्वतन विभाग प्रमुख प्रभुराज थापाले प्रदान गरेका थिए ।  सो क्रममा उनले वित्तिय अनुशासन, पारिवार बजेट निर्माण, आम्दानी खर्च र वचतको व्यवस्थापन, कर्जाको महत्त्व र प्रयोग, कानुनी अवधारणाका आधारमा कालोसुचिमा पर्ने सम्मको अवस्था बारे सबैलाई ज्ञानमुलक सचेतना सामाग्री पस्केका थिए । साथै, प्रस्तुतीका क्रममा लघुवित्त सम्बन्धि भ्रम र यथार्थ सम्बन्धि समसामयिक बिषयबस्तुहरु सहभागीहरुले बुझ्ने गरि सरल भाषामा बुझाएका थिए ।

उक्त कार्यक्रममा शाखा कार्यालय कुश्मा अन्तर्गत संचालित उत्कृष्ट केन्द्र व्यवस्थापन गर्ने ३ जना केन्द्र प्रमुख तथा वित्तिय संस्थाबाट कर्जा लिएर व्यवसाय संचालन गर्ने मध्ये बर्षका ३ उत्कृष्ठ व्यवसायिक ग्राहकलाई समेत कदर पत्रद्धारा सम्मान गरिएको थियो ।

करिब ३० जना ग्राहक सदस्यहरुको सहभागिता रहेको वित्तीय साक्षरता कार्यक्रमको अध्यक्षता केन्द्र नं. १८९ कि सदस्य युगमाया गिरीले गरेकी थिइन् भने कार्यक्रमको संचालन शाखा प्रबन्धक गणेश गौतमले गरेका थिए ।