सेयरबजारमा लगानी गरेर वाणिज्य बैंकहरुले कमाए रु.९.३७ अर्ब, अधिकांशको आम्दानी वृद्धि

काठमाण्डौ । वाणिज्य बैंकहरुले सेयरबजारमा लगानी गरेर ९ अर्ब रुपैयाँ भन्दा बढी आम्दानी गरेका छन् ।  

बैंकहरुले चालु आवको तेस्रो त्रैमाससम्म विदेशी मुद्राको कारोबार र सेयरबजारबाट ९ अर्ब ३७ करोड २१ लाख रुपैयाँ आम्दानी गरेका छन् ।  

बैंकहरुले सेयरमा गरेको लगानीबाट हुने आम्दानी व्यालेन्स्ड सिटमा ‘नेट ट्रेडिङ इनकम’ सूचकमा देखाएका हुन्छन् । साथै बैंकहरुले विदेशी मुद्राको कारोबार विशेषगरी डलरको खरिद बिक्री गरी त्यसबाट हुने आम्दानी समेत यस्तो सूचकमा जोडेका हुन्छन् ।  

तर बैंकहरुको डलर सटहीबाट हुने आम्दानी भन्दा सेयरमा गरिएको लगानी आम्दानी बढी हुने भएकाले यो सूचकलाई मुख्यतः सेयरमा गरिएको लगानीबाट हुने आम्दानी बुझ्न सकिन्छ ।  

जस्तै कुनै एक बैंकले सूचीकृत एउटा कम्पनीको सेयरमा १० लाख रुपैयाँबराबरको सेयर किनेको छ र केही महिनापछि त्यसको भ्यालु १२ लाख रुपैयाँ पुग्यो त्यसपछि बैंकले सेयर बिक्री गर्छ भने २ लाख रुपैयाँ बैंकको ट्रेडिङ आम्दानी हुन्छ । तर बैंकले उक्त सेयर नबेचेर राख्छ भने त्यो अनरियलाइज्ड गेनको रुपमा देखिन्छ । 

तेस्रो त्रैमाससम्म सबैभन्दा बढी सेयरबजारमा लगानी गरेर ग्लोबल आइएमई बैंकले. ९५ करोड ८९ लाख रुपैयाँ आम्दानी गरेको छ । बैंकको यो आम्दानी गत आवको सोही अवधिसम्मको तुलनामा ४५.५२ प्रतिशत बढी हो ।  

तेस्रो त्रैमाससम्म आइपुग्दा कृषि विकास बैंकबाहेक सबैले उल्लेख्य आम्दानी गरेका छन् । कृषिको यस्तो आम्दानी भने ६ करोड ९७ लाख रुपैयाँ ऋणात्मक रहेको छ । यो बैंकले गत आवको सोही अवधिसम्म २८ करोड ९९ लाख रुपैयाँ नाफा कमाएको थियो ।  

गत आवको तुलनामा सबैभन्दा बढी यस्तो आम्दानी बढाउनेमा भने कुमारी बैंक रहेको छ । गत आवको तेस्रो त्रैमाससम्म सेयरबजारमा लगानी गरेर २५ करोड ५६ लाख रुपैयाँ मात्रै आम्दानी गरेको यस बैंकले चालु आवको सोही अवधिसम्म ११९.०१ प्रतिशत बढाएर ५५ करोड ९९ लाख रुपैयाँ पुर्याएको छ ।

गत आवको तुलनामा यस्तो आम्दानी नेपाल बैंकको भने घटेको छ । यो बैंकको यस्तो आम्दानी गत आवको सोही अवधिसम्मको तुलनामा ३५.६९ प्रतिशत घटेको छ ।