आइपीओ निष्कासनको अनुमति माग्दै चार कम्पनीले बोर्डमा दिए आवेदन, कुनले कति ?

काठमाण्डौ । चार कम्पनीले आइपीओ निष्कासनको अनुमति माग्दै नेपाल धितोपत्र बोर्ड (सेबोन)मा निवेदन दिएका छन् ।  

होटल तथा पर्यटन समूहका दुई कम्पनी र उत्पादन तथा प्रशोधन समूहका दुई गरी चार कम्पनीले वैशाख १४ गते बोर्डसँग अनुमति माग्दै निवदेन पेश गरेका हुन् ।  

होटल तथा पर्यटन समूहअन्तर्गतको डोलेश्वर भिलेज रिर्सोट एण्ड फार्म र केटीएम हस्पिटालिटी लिमिटेडले आइपीओको अनुमति मागेका छन् ।  

जसमा डोलेश्वर भिलेजले अंकित मूल्य १०० रुपैयाँ दरको कुल १६ करोड २० लाख रुपैयाँ बराबरको कुल १६ लाख २० हजार कित्ता आइपीओ निष्कासनको अनुमति मागेको छ । कम्पनीको धितोपत्र निष्कासन तथा बिक्री प्रबन्धकमा सिटिजन्स क्यापिटल लिमिटेड रहेको छ ।  

त्यस्तै, केटीएम हस्पिटालिटी लिमिटेडले पनि अंकित मूल्य १०० रुपैयाँ दरकै कुल १५ करोड ५० लाख रुपैयाँ बराबरको १५ लाख ५० हजार कित्ता आइपीओ निष्कासनको अनुमति मागेको हो । कम्पनीको बिक्री प्रबन्धकमा आरबीबी मर्चेण्ट बैंकिङ लिमिटेड रहेको छ ।  

यसका साथै उत्पादन तथा प्रशोधन समूहतर्फका भगवती स्टिल्स इन्डस्ट्रिज र एशियन कंक्रिटो लिमिटेडले आइपीओ निष्कासनको अनुमति मागेको छ ।  

भगवती स्टिल्स इन्डस्ट्रिले अंकित मूल्य १०० रुपैयाँमा १३३ रुपैयाँ थप गरी प्रतिकित्ता २३३ रुपैयाँ दरमा ३४ करोड ९५ लाख रुपैयाँ बराबरको १५ लाख कित्ता आइपीओ निष्कासनको अनुमति मागेको छ । कम्पनीको बिक्री प्रबन्धकमा नबिल इन्भेष्टमेन्ट बैंकिङ लिमिटेड रहेको छ ।  

यसका साथै एशियन कंक्रिटोले भने अंकित मूल्य १०० रुपैयाँ दरमै १० करोड ६२ लाख ५० हजार रुपैयाँ बराबरको १० लाख ६२ हजार ५०० कित्ता आइपीओ निष्कासनको अनुमति मागेको छ । कम्पनीको बिक्री प्रबन्धकमा पनि नबिल इन्भेष्टमेन्ट बैंकिङ लिमिटेड नै रहेको छ ।