देश कमजोर भए कसैको अस्तित्व सुरक्षित रहँदैन : प्रदीप ज्ञवाली

काठमाण्डौ । नेकपा (एमाले) का नेता प्रदीप ज्ञवालीले राष्ट्रिय स्वतन्त्र पार्टी (रास्वपा) को पहिलो महाधिवेशनलाई सम्बोधन गर्दै देश कमजोर भए कुनै पनि दल, नेता वा शक्ति सुरक्षित नहुने भन्दै राष्ट्रिय हित र लोकतन्त्रप्रति सबै राजनीतिक शक्ति जिम्मेवार बन्नुपर्ने बताएका छन्।

उनले कठिन परिस्थितिमा राष्ट्र, लोकतान्त्रिक व्यवस्था र राष्ट्रिय एकताको संरक्षण अनिवार्य भएको उल्लेख गर्दै “अनिकालमा बिउ जोगाउनु, हुलमुलमा जिउ जोगाउनु” भन्ने उक्ति स्मरण गराए।

ज्ञवालीले परराष्ट्र नीति सन्तुलित र राष्ट्रिय हितअनुकूल हुनुपर्नेमा जोड दिँदै जनजीविका, रोजगारी र आर्थिक सुधारलाई प्राथमिकतामा राख्नुपर्ने बताए।

साथै, लोकतन्त्रलाई कमजोर पार्ने प्रवृत्तिबाट सचेत रहनुपर्ने उनको भनाइ थियो।

उनका अनुसार जनताको विश्वास प्राप्त गर्नु उपलब्धि भएपनि त्यसलाई परिणाममा रूपान्तरण गर्नु ठूलो चुनौती हो, जसका लागि सबै राजनीतिक शक्तिले साझा जिम्मेवारी वहन गर्नुपर्ने हुन्छ।