लुम्बिनी प्रदेश सभामा बजेटमाथि सैद्धान्तिक छलफल हुँदै

काठमाण्डौ । लुम्बिनी प्रदेश सभाको आठौँ अधिवेशनअन्तर्गत आज सोमबार दिउँसो १ बजे बस्ने दशौँ बैठकमा आगामी आर्थिक वर्ष २०८३÷८४ को बजेटमाथि सैद्धान्तिक छलफल हुने भएको छ।

प्रदेश सभा सचिवालयका अनुसार बैठकमा आर्थिक मामिला तथा योजना मन्त्री धनेन्द्र कार्कीले आगामी आर्थिक वर्षको राजश्व र व्ययको वार्षिक अनुमान (बजेट)माथि सैद्धान्तिक छलफल गरियोस् भन्ने प्रस्ताव सभामा प्रस्तुत गर्नेछन्। प्रस्तावमाथि प्रदेश सभा सदस्यहरूले आ–आफ्ना धारणा राख्नेछन् भने छलफलका क्रममा उठेका प्रश्नहरूको मन्त्री कार्कीले जवाफ दिने कार्यक्रम रहेको छ।

त्यसैगरी, मन्त्री कार्कीले ‘आर्थिक वर्ष २०८३/८४ को सेवा र कार्यका लागि प्रदेश सञ्चित कोषबाट केही रकम खर्च गर्ने र विनियोजन गर्ने सम्बन्धमा व्यवस्था गर्न बनेको विधेयक’ पनि सभामा पेश गर्ने कार्यसूची रहेको सचिवालयले जनाएको छ।

प्रदेश सरकारले आगामी आर्थिक वर्ष २०८३/८४ का लागि कुल ३७ अर्ब ३८ करोड ४५ लाख रुपैयाँ बराबरको बजेट प्रदेश सभामा प्रस्तुत गरेको छ। सो बजेटमध्ये पूँजीगततर्फ २२ अर्ब ७१ करोड ६५ लाख ४० हजार रुपैयाँ र चालुतर्फ ११ अर्ब ११ करोड २७ लाख १० हजार रुपैयाँ विनियोजन गरिएको छ।

वित्तीय व्यवस्थासमेत समावेश गर्दा कुल बजेट ३७ अर्ब ३८ करोड ४५ लाख रुपैयाँ पुगेको छ। चालु आर्थिक वर्ष २०८२/८३ मा प्रदेश सरकारले ३८ अर्ब ९१ करोड रुपैयाँको बजेट प्रस्तुत गरेको थियो।